makita ra unya ang katag sa katagbawan

kay kanunay wa’y panutbras
ang akong pahiyom matag higayon
nga manggilok akong lapalapa
sa tila sa sungayan nga wa’y kutas
sa iyang pagdapit nako aron moapil ko
sa lumba sa hinabhabay og humba

gihayblad ang gisangonan pagbantay
sa akong luyo aron di ko mahilayo
sa iyang tunob subay sa linya
sa mga langgam nga igo ra
gamantinir og tuhik-tuhik

sa wati sa ilang kahinam

di lang gyod kuno ko magmahay
kon tawgon kong butakal sa kataposan
ug igo na lang intawon maghalhal
kay ulahi na ang pagbasol
inig katilaw na nakog tagam


-- MICHAEL U. OBENIETA
Topeka, Kansas, USA