pyesta

1. Mga Maskara

Nabalhing mga gabii sa nobinaryo.
Ang lungsod nagdilaab
Sa gidagkotang mga tinggarol
Ning atong mga kasingkasing.
Sinul-uban ang pikas tiil sa paghandom
Ug ang pikas sa pangandoy, mokuyog kita
Ning siyam ka mga lakang sa tinuig
Nga parada sa panahon. Subay sa
Mapig-ot nga kadalanan maoy nag-agak
Ning putolputol tang mga panon
Ang duha ka higanti’ng maskara.
Duha ka dakung ulo ug mga mata’ng
Way pagpamilok, nga gisunodsunod
Sa nahimuot nga mga kabataan.
Ang tanan andam na pagmartsa
Sa duyog sa naandang tugtog.
Samtang sa dan-ag sa nagpid-okpid-ok
Nga mga luminarya, ang mga nanan-aw
Daw sa hilom nangutana
Kon kinsa man kadtong nanagsul-ob
Sa mga maskara karong tuiga.

2. Kulong Ug Kortina

Sa giablihang mga bentana
Ning haw-ang tang kalibutan
Hinayng nanagkaway
Ang gisad-ong tang mga kortina.
Sa mainit nga mga kadalanan
Ang mga tigulang nga mga kaminero
Sa pulang mga sinina ug daang mga kalo
Nagpadayon pagpamonpon sa mga libaong
Ug pagpangibot sa mga gunahon
Sa batoong kadaplinan.
Ug didto sa kanhi gisirhang silong
Niadtong karaang balay nga karon
Ginganlan nag Judy’s Beauty Saloon
Ang laray sa kababayen-an
Way hunong sa ilang pagpamaypay
Samtang nagpaabot
Sa ilang turno pagpakulong.

Ang adlaw misilang sa tumang kainit
Ug gipanginot ang mga abog…

3. Ang Mga Bisita

Sunodsunod ang paghunong
Sa mga siradong sakyanan
Didto sa abugong eskina.
Dala ang dagkong mga maleta
Milusad ang mga pasahero.
Mga kanhing tagalungsod nga dugay
Nang nanglangyaw ug karon namalik
Aron mamista. Nabalhin na ang ilang
Mga hitsura, ug ang ilang mga tuno.
Apan sa ilang pagpadulong ngadto
Sa kanhi nilang mga pinuy-anan
Ang ilang mga lakang mosubay
Sa daang sanglitanan
Bahin sa prosesyon
Nga bisan unsa ang kataas
Mobalik ra gihapon
Sa simbahang iyang gigikanan.
















4. Ferris Wheel

Daw giasitihan, ang mga ligid
Sa atong hunahuna
Way sambod nga nanagtuyok
Uban sa bag-ong gipatindog
Nga Ferris Wheel.
Mopataas, mopaubos
Sa lainlaing kakusog ug katulin.
Unya sa daklit tang paglabay
Didto sa itaas
Mao ray atong nakita
Sa atong pagdungaw
Ang nanaghangad nga mga nawong
Nga sama kanato nangandoy usab
Pagpatigbabaw, pag-ambit
Sa hawa’ng wanang sa kahanginan.

5. Sama Sa Cotton Candy

Sama sa cotton candy
Nga hagkot ning atong mga dila
Dali rang mahilis
Kining gisaulog tang mga adlaw.
Ug ang pinalit tang bahin sa katam-is
Nga nag-ulbo sa tumoy
Ning gikuptan tang tukog
Molungtad lang sa igong gidugayon
Sa pipila lang ka pagtulon
Sa pipila lang ka paglad-ok.

6. Lipatlipat

Sa ibabaw ning gamayng lamisa
Sa panahon, ang mga gutlo nanagligid
Uban sa giposta tang mga sinsiyo.
Nag-alirong kita ning dula sa lipatlipat.
Tulo ka taklob, usa ka liso.
Tulo ka gabii, usa ka damgo.
Ay, king kinabuhi!
Daghan ang mga higayon
Nga tanyagan kitag
Way dag-anang mga pagpili.
















7. Ang Mga Tagana

Besperas. Gipukaw sa nagkatayng
Bagting sa mga lingganay
Ug sunodsunod nga mga pagbuto
Sa luthang ug mga kwitis
Ang nagpyestang lungsod
Sayo’ng mibangon ug nangabli
Sa iyang mga pultahan.
Sa mga dapog sa atong kasingkasing
Nagsugod na pagbukal, pagkaluto
Ang atong mga tagana.
Nga uban sa dakung kahinangop
Andam nang sukaron ug sandokon
Hangtod sa katapusang hiwa
Hangtod sa mga dukot
Sa mga luwag ning atong pagsaulog.

8. Ang Nakabuhing Paburot

Nagkalainlain ang mga bulok
Sa atong mga balatian nga karon
Hugot nga napuno sa hangin
Sama sa mga paburot.
Sa atong mga tudlo gihawiran ta
Ang naghigot nilang mga lambo.
Apan duna kanilay makabugto
Ug sa ilang pagpakabuhi
Wa kitay laing mahimo
Gawas na lang paglantaw
Sa ilang paglupad, sa pagpahilayo
Ug pagkahanaw.

9. Human Sa Sayaw

Human sa atong paggakos
Sa lainlaing mga hawak
Sa atong mga pangandoy
Human sa atong pagpahalipay
Sa raynang gipurongpurongan
Human sa atong pagpasakop
Sa daklit nga gingharian
Sa masaya’ng kagabhion
Motugdon kita pagbalik
Sa naukay tang pinuy-anan.
Didto, sa usa ka suok
Atong gisad-ong
Ang gisingtan tang barong
Ipon sa laylayng mga saya.
Ug unya sa atong pagpiyong
Motikang kita
Gikan ning nahuman tang damgo
Ngadto na usab sa sunod tang damgo.

















10. Kahulogan

Natapos na ang solemneng misa.
Sa way landong nga atubangan
Niadtong karaang simbahan
Ang pundok sa kababayen-an
Nagsugod na sa ilang pagsinulog
Sa ilang pagpanagsayaw.
Ang tinagubtob sa nagduyog nga tambol
Daw kusog nga mga pinitik
Sa ilang mga kasingkasing.
Sa ilang mga nawong nangagas
Ang mga singot
Nga usahay sagolan sa mga luha.
Akong nakita ang usa ka babayeng tigulang
Sa hinay niyang pagkiaykiay
Nga sa usa ka puting panyo
Mipahid sa iyang mga mata
Ug unya mihangad ngadto sa langit.
Intawon Mahal nga Patron, siya nagkanayon
Luwasa ang dalaga kong tua sa Manila
Nga karon gidagit na sa koridora…

Ay, ang adlaw misilang sa tumang kainit
Ug gipaningot ang mga abog.


-- URIAS A. ALMAGRO, M.D.
New Berlin, Wisconsin, USA