akong pagpauli

Ang liyok
sa daw anino’ng mga tawo,
nga nag-alirong
sa nagpid-okpid-ok nga kasiga
niadtong gamay’ng lamparilya,
miabli ug mihatag og luna
alang kanako.
Gitunolan ako
og usa ka baso sa tuba.
Ug sa akong pagyarok
akong nabati
ang kainit sa panaghiusa
nga mikuyamang ug miilis
sa nagpislit nga kamingaw
sa akong balatian.
Di na maihap ang katuigan
nga ilang gilibodlibod
kadtong basoha diha kanila.
Samtang sa hilom
sa kanunay sila nasayod
nga moabot gihapon ang panahon
nga ako moipon pag-usab kanila
ug moyarok
niadtong nagpaabot kanako’ng
tagay.


-- URIAS A. ALMAGRO, M.D.
New Berlin, Wisconsin, USA