hay, babaye!

Sigon pa sa bibliya
Kaming mga sakop ni Eba
Gikutlo lang sa gusok ni Adan.

Mga mahuyang kuno kami,
Puno sa pailob ug pagluom,
Mopas-an sa tanang alantuson.

Apan sakop kami sa tribong maanyag,
Nabanhaw sa lipak sa kawayan
Taliwala sa takdol nga bulan.

Naggikan sa lapok nga gitumban.
Gidibuho sa kamot nga bulawan.
Gibulad sa walay undang nga ulan.

Nag-antos kami kasagaran apan
Sige lang kon kini ang kapalaran--
Kay sa katahom kami gipahiran.


-- MARIA VICTORIA BELTRAN
Cebu City, Philippines