ang mga pinili

Kitang managdasig managpabaylog kinabuhi sa mga nagtinga nag-ilaid
makamatikod sa halos-dili-madiskitahang mga kausaban ug kalainan
Kitang mapaniiron manunugilon tigsulat sa obra maestra
talaadlawan sa inadlawng panikaysikay ug buluhaton
Kitang maghuhubit ug manunukbil:

sa kaanyag ug kalaksot
sa kahamugaway ug kalisod
sa kalinaw ug kagubot
sa kagawasan ug pagpig-ot
sa pagpasaylo ug pagdumot
sa pag-abot ug pagtalikod

(Samtang uban gilalik gikan sa gusok--- Kita gimugna hukad sa Utok
Kasingkasing ug mga Mata)
Kita linalang espesyal mga pinili ni Bathala:
Mga Maukitong Magbabalak Mausisahong Magsusulat---
Mag-unsang kalibotan kon wa ta?


-- MELQUIADITO M. ALLEGO, M.D.
Palm Harbor, Florida, USA