badlis sa palad

Makapila ba ihikaw ang gugma
aron ibadlis sa palad
ang iyang kaagi?
Makapila ba mapokan ang pangandoy
diha sa pagbugtaw sa mga tinguha
aron nunta’g sugilanon ang matag tunob
nga natigom sa handurawan?

Namauli na ang mga hulmigas.
Ang mga kanding
namasilong sa kabatoan.
Anino sa adlaw gihinay paghipos
ilalom sa kakahoyan.
Kasingkasing ko, kinsay moalamalam kanimo?

Paghinay, higala,
kay basig makatunob ka
sa mga damgo kong gibilin
tipon sa mga abog sa handomanan
ibabaw sa mga gising balili.
Sa akong pagdawat sa kahilom
wa na kanilay mangita
sama sa uhong sa Agosto
mogitib way tag-iya.

Badlis sa palad namat-an kog kahayag
may balatian diay ang binhi
diha sa lunhaw niyang takoban;
may katawa, may talidhay,
may katahap, may pagluib,
may luha ang kasapaan, ang lagdo,
ang lumot, ang kanaas sa tiil sa ulan,
ang mga udlot sa ilang pungango
maoray akong bahandi.
Kay sa akong pagpaulipon sa gabon
giawitan ko kanunay ang banagbanag,
gisapwang ko ang bayhon sa mithi
aron umolong bantayog
sa mga adunahan,
apan ang ilang gigantic kanako
mga biya nga pagtagad.
Giluyong ko ang liso sa panglimbasog
tukma sa lakang sa taknaan sa pulso,
apan way bulawan sa tumoy sa bangaw,
badlis sa palad kong kabos.


-- RENE ESTELLA AMPER
Boljoon, Cebu, Philippines
____________________________________________________________
Kining balaka usa sa mga balak sa koleksyon ni anhing Dr. Rene Estella Amper nga ang ulohan Payag Ibabaw Sa Hangin. Gihatagan ni Rene og kopya sa orihinal ang iyang suod nga higala nga si Urias A. Almagro. Uban sa dakung pagbulig sa tigdumala niining balayan sa Kabisdak, ikasabwag na gyod kini ngadto sa mga magbabasa sa mga balak sa pinulongang Binisaya.