pagtulun-an bahin sa bulok

Niadtong gamay pa akong bata
Nangutana ako sa usa ka tigulang
Kon unsa man
Kadtong langgam nga naglibotlibot
Didto sa luyo’ng tugkaran.
Ug kay gabii man kadto
Nga hingpit sa kadulom
Iya akong gitubag
Nga kadtong langgam
Usa ka uwak nga labihang kaitom.

Niadtong gamay pa akong bata
Nangutana ako sa usa ka tigulang
Kon unsa man
Kadtong langgam nga naglibotlibot
Didto sa atubangang tugkaran.
Ug kay gabii man kadto sa takdol nga bulan
Iya akong gitubag
Nga kadtong langgam
Usa ka puti’ng salampati.


-- URIAS A. ALMAGRO, M.D.
New Berlin, Wisconsin, USA