pagtambal kang dodong nga duna'y diperensya

Nagpatan-aw si Dodong sa iyang mga mata
kay kuno aduna'y diperensya.
Niadto siya sa doctor nga pulpol
sa iyang lungsod sa Bohol
Apan wala kini nakit-an nga bukol.
Busa nisakay siya sa barko
padulong sa syudad sa Sugbo
Ug ang doktor didto nag-alboroto,
Matod pa niya
Pauli didto sa inyoha
Kay wala pa nadiskubre ang litanya
Ug ng tambal sa mga buta
Nga modayon og balitok
Inig maigo ni Kupido ang utok.

Niuli si Dodong sa ilaha
Nitan-aw sa iyang hinigugma
Nga tinuod maanyag nga dalaga
Apan ang kasingkasing tig-a.
Nagpatambal siya sa manghihilot.
Gipaasohan siya og bunot.
Nagsul-ob siya sa antyohos
Ug nagsige’g panguros

Apan ang iyang mga mata
Nagpabilin lang gihapon nga buta
Ug ambot ug ngano nga ang iyang dughan
Matag segundo gikulbaan.


-- MARIA VICTORIA BELTRAN
Cebu City, Philippines