si yulalia sa merlion

Bitbit siya sa batan-ong si Morad, akong higala, nga matod pa gustong makighinabi sa usa ka magbabalak nga Bisaya, kuyog ang usa ka batalyong hugpong, tungod kay nikaylap ang balita ni Yulalia nga adunay Bisayang gustong mosulat kabahin sa ilang mga kinabuhi.

Ingon sila gikinahanglang lamingon sa ka’g unom ka bulan dinhi. Nikilo si Joy, dayong ingon nga, “Kahibalo na ka!” Dugang pa sa asawa sa habal-habal drayber sa Carmen, Bohol.

Paboritong tugpahanan sa mga langgam ang Singapura, matod ni Cherry, ang kanhi maesta gikan sa Zamboanga. Samboangan gayod ang tinubdan niana, kuya. Gikan sa Sama nga pulong: tapokanan. Tapokanan sa mga isda.

Paborito nga lugar ang Orchard sa mga iro. Bisaya nga mga iro, ang panapos ni Yulalia nga gikan sa Kamagayan sa Sugbo ug beterana sa Saudi, Hong Kong, Dubai ug karon Singapura.

Ug lanog kaayo ang ilang kasadya niadtong adlawa.


-- LEO BOB FLORES
Bukit Batok, Singapore