ang bulingit nga dispatser sa south terminal

Nagtuo silang duna koy kalabotan
sa pagkasunog sa apartment
tungod kay sa akong paglayas
wa koy gibilin gawas sa mga balikas
nga unta wa man kuno koy laing kapanalanginan
gawas sa akong kawad-on
apan karaan na baya kaayo tong balaya
unya ang tag-iya nga akong katalirongan
suod ko pa gyod nga higala

Milabay ang kapid-an ka tuig
unya wa palandonga nagkita mi
atol sa piyesta sa Pakigne
tin-aw ang langit niadtong adlawa
uban siya sa iyang asawa ug mga anak
sa iyang barog maila
nga usa na siya ka halangdong lungsoranon
nahimut-okan ming duha
wa miy sarang kahisgotan
kabahin sa among kabatan-on
ug dili lang tungod kay maayo kining pagkagay-ot
ang among mga kamot nagkurog
ang among lamano taphaw ug hinanali
tinuod gyod diay nga ang usa ka katalagman
way pagkaugdaw
tataw nga way si kinsang makalingkawas
way makalighot way makaipsot
hinonoa ang tanang nahilambigit
magbalik-balik og labang sa badlis sa panumdoman
sama kini katin-aw sa mga buwa
aga nanglutaw sa tumang kamalinawon
apan sa makausa pa
bisan tuod labaw kong giayran ang paghinulsol
labawng gamhanan ang gihasol kong tanlag
kay sa akong paghubog-hubog

Apan ang kasosyo ko kaniadto
nakakaplag og bag-ong kusog sa iyang pamilya
kusog ug kalinaw

Igsoon ko sa luha
ang mga kalag niadtong mga kaserang nangapagtong
sayon uyamot tingali kaayong nakauliot
tidlom sa alimpatakan sa inosente mong mga anak
tan-awa
malipayong kaayo silang nagdagan-dagan
sulod-gawas sa mga toldang pinintalan
sa malamaton nga kolor sa kalayo.

-- VICENTE VIVENCIO BANDILLO

Dubai, United Arab Emirates