kural natong kawayan

Kural natong kawayan
Imong giayog langsang
Haron dili mairog ang utlanan
Sa atong yutang gitukoran
Sa payag tang gipuy-an
Uban sa atong pinobring katigayonan
Nga tulo ka sartin,
Upat ka lusang bahawan,
Ug usa ka bandihado.
Ang atong kulon nga sa takuling
Itom na kaayo
Tadyawng gilumutan
Arinulang regalo pa
Sa kasal nato
Wala tingale mangahas paglungkab
Sa payag tang hapit na mahun-ag
Apan ang dili mahimong itugyan
Ang yuta natong natawhan.


-- HAZELEN C. COBOL
Argao, Cebu, Philippines