ang kamingaw ko kanimo

Dunay hunghong sa kamingaw nga nasalaag
Dapit sa among balangay
Dunay gipangita

Naglakaw-lakaw ang maong hunghong
Nanuktok sa kada balay sa daplin sa kalsada
Nangutana kon nakaila ba kuno sila
Sa iyang gipangita

Iyang gisulti ang akong ngalan

Sa usa namo ka silingan nga nakaila kanako

Ug tuod man iya kong natultolan

Iya akong gitutokan og dugay
Ug migakos siya kanako, miiyak ug gihagkan niya
Pag-ayo ang akong mga dunggan lahos sa dughan

Akong gisuot ang akong jacket. Gisirado

Ang zipper. Namugnaw na usab ako sa paghunahuna

Kanimo. Nagpabilin lang gihapon ikaw

Bisan wala na'y tingog nga mapaminaw.

-- RIC S. BASTASA

Katipunan, Zamboanga del Norte, Philippines