ang mananaygon

Hapit na pod ang bulan sa Disyembre,

ug ang kadalanan imong giangkon
pag-usab sama sa langgam nga alimukon
ikaw naglupadlupad ug nitugdon
sa mga balay, labi na'g nagmasulob-on.

Dala ang gitara nga karaan
daghan ka'g gipangharanahan
ug ang tak-om nga bintana ug ganghaan
Kasadya ning Taknaa, imong gitukaran.

Nilanog ang sonata sa palibot
dinhi sa balay, nagkimbotkimbot
patabanan pa nimo sa mga utot
sa imong bag-o nga torotot.

Usahay gukdon ka sa irong buang
nga wala ganahi sa imong mga tikang
o dili ba kaha gialingog-ngugan
sa yabag mong ginhawaan.

Samtang nanaygon kas katawhan
nga napuyo ning mga balay sa adunahan
kada-adlaw gikablit nimo ilang balatian
nga naglibog og unsaon nga malikayan

ang buwan sa Disyembre nga dugay na

imong gipangandaman.


-- MARIA VICTORIA BELTRAN
Cebu City, Philippines