syudad sa kamingaw

Sa akong paglakawlakaw
nga daw nagsubay sa mga liki
sa mga aseras
ning langyawng syudad,
sa wa lang tuyoa
akong ningbanggaan
ang lawas sa kamingaw.
Nagsul-ob siya og taas ug baga’ng sapot,
apan akong ning-ilhan
nga kadto mao ang iyang lawas
kay may gigahion man
nga sama kagahi
sa unod sa akong pag-inusara.
Ang hinagtok sa talinis niyang mga botas
mao ray nabilin
sa daklit
apan, sa akong paminaw, magsublisubli
namong pagpanagtagbo.
Wa ko masuta kon nagkasugat
ang among mga tinan-awan
kay ang iyang mga mata,
sama sa akoa,
nagpasalipod
sa dag-om sa mga sanglas.
Dugay ko siyang gibantayan
sa iyang pag-inusarang pagtindog
ilalom sa aserong kahayag
niadtong haw-ang nga eskina,
nag-atang,
sama kanako,
sa sakyanan
nga maoy sakyan
niadtong mga way gipadulngan.

-- URIAS A. ALMAGRO

New Berlin, Wisconsin, USA

Hulagway: TITO ALQUIZOLA