budyong

Gikan sa iyang baba akong nadungog
ang alas dos sa kaadlawon,
namukaw,
nanawag,
nagpahinumdom sa mga gutlo’ng lumalabay.
Ang iyang kananoy
mahawot, tinipigan,
sama sa pinitik
sa nagkuba’ng dughan sa dagat,
sama sa pagbitad
sa sulog
nga naglatay ning akong kaugatan.
Ang iyang lanog nagtubod
gikan sa tutonlan sa panahon.
Unya
sa higayon’g akong hidunggan,
modulhog ako ngadto sa utlanan
sa akong mga damgo,
ngadto sa kahilom sa pagbuka
sa mga pilok sa banagbanag.
Ug unya
gikan sa iyang baba mogawas ako,
aron mokuyog niadtong mga gagmay’ng sakayan
nga mibuslot sa mga bungbong sa kangitngit,
gibugsayan, nanaglayag,
padulong sa naggilaw nga kalawran.

-- URIAS A. ALMAGRO

New Berlin, Wisconsin, USA