kaugalingong hulagway

Dunay panganod nga naghunong
Sa taliwala sa langit sa agtang,
Kansang landong mitaklap
Sa mga walog ug kabungtoran
Sa nagpaluyong utok.
Ang mga balod sa mga pilok
Way paglihok,
Wa magpaila kon naghunas o nagtaob
Ang lalom nga dagat sa mga mata.
Ang puti’ng mga aping
Hawan sa pagkaluspad,
Daw mga wanang nga gitaboanan sa yelo
Sa panahon sa tingtugnaw.
Gitaliwad-an sa mga ngabil,
Ang langob sa baba nag-abli og dyutay,
Igo rang kaagian
Sa lawas sa kahilom.
Sa bungdo sa yuta
Sa ninglubad nga kwelyo,
Mitindog ang punoan sa liog.
Agianan sa mga sapa sa kaugatan
Nga nagpadayon pag-anod
Sa mga gapnod sa kagahapon.
Ang hanayhay’ng mga abaga
Duha ka mga sanga’ng nangabawog
Sa gibug-aton
Sa nahisalay’ng mga tunob.
Ug sa wala’ng pikas sa dughan,
Nagkang-a ang bulsa sa kasingkasing.
Gipugngan
Og gamay’ng itom nga butones.

-- URIAS A. ALMAGRO
New Berlin, Wisconsin, USA