ang biktima

Karong moabot nga Abril, ma-21 anyos na unta
ang iyang panuigon. Ug mahingpit na unta
ang iyang pagkalumolopyo. Di na
magkinahanglan pag temporaryong permiso
pag-drive, o pagpakita og ID inigpalit og ilimnon.
Duna na unta siya’y tingog ning atong katilingban.

Ug ang iyang inahan way nahibaw-an
bahin kang Camus ug sa iyang mga teoriya:
Nga ang sinugdanan ning atong mga kagul-anan
mao nga kita naglaom.
Mao ray ningbaw-an sa iyang inahan
ang usa ka lapad nga talan-awon
diin usa siya ka tanos nga bugang
nga way pagkapilay
sa paghuros sa hangin.

Karon, wa na siya maglihok nga gitabonan
sa gum-os nga puting panapton,
nagpaabot na lang sa higayon nga siya ilhon.
Sigurong siya ilhon ug kuhaon sa mga kabanay,
ug ang iyang ngalan
o tingali gani ang iyang larawan
mahipatik og kadyot
sa mga pamantalaan.

Ug mao ray ningbaw-an sa iyang inahan
ang ugang talan-awon
diin usa siya ka laya’ng dahon
nga gipadpad
sa paghuros sa hangin.

-- URIAS A. ALMAGRO

New Berlin, Wisconsin, USA