usa ka esena sa kamatayon

Ang kandila nagpid-okpid-ok
ug inanay’ng nahilis
samtang gikuptan sa itom
nga kamot sa kagabhion.
Kadtong nanagtindog
Ug kadtong nanagluhod
way mahimo
gawas sa pagsud-ong
sa lumoy’ng lawas
sa bata’ng naghigda
sa daang banig sa tabla’ng salog.
Ang iyang ulo nahiluna
sa puti’ng unlan
nga sama sa usa ka sakayan
nga naglutawlutaw
sa usa ka dagat
nga way tubig, way balod.
Hingpit ang kahilom.
Hingpit ang kawad-on
sa bisan gamay na lang nga kasikas.
Gawas ra sa pinugos nga paghanggap
nga nag-anam pagkabugto,
hangtod nga ang kataposan
wa nay uban nga tingog
ug misagol sa nagsanap nga kahilom

-- URIAS A. ALMAGRO
New Berlin, Wisconsin, USA