kahilom

tigumon nako ang kahilom
sa akong lawak, unya akong tipigan

sa akong alimpatakan ug sa mga adlaw

nga igo ra intaw’ng molabay,

magkaanam kini'g kadaghan
hangtod nga moawas, mangita'g

kagawsan, ug manglusot kini

sa akong mata, sa akong ilong, sa akong baba,

sa akong mga tudlo, sa papel hangtod

manggamot, manalingsing kini'g

laing kahilom diha sa imong gibasa

-- JONA B. BERING
Tuburan, Cebu, Philippines