limbay sa kagabhion

Pasagdi ko'ng mokatkat sa kaluha nga bungtod
Tungod kay niining gabhiona mangita kog tubod.

Pasagdi ko'ng magkaapkaap sa talagsaong lasang
Tungod kay akong pangitaon ang karaang liyang.*

Pasagdi ko nga motugkad sa tinagong atabay
Kay buot ko'ng sukdon ang lawom nga kalipay.

Pasagdi ko nga mosalom sa imong tungod
Kay buot ko'ng mabati ang imong pagbalud.

Ug ayaw kabalaka kay dili ko ikaw pasagdan
Sa akong makab-ot kitang duha ang mabulahan.

___________________________________

*liyang: langub nga adunay tubod


-- ANIJUN MUDAN-UDAN
Malaybalay, Bukidnon, Philippines