mga tipak: mga mubo’ng balak

24. Agila

Ang agila nagpadayon paglupad
didto sa kapanganoran.
Unta iyang matuman pagtuyok
ang hingpit nga liyo
sa iyang pagpanimpalad.
Sa di pa siya hiapsan sa hiniloang pana.


25. Pagbalik

Ang mga balod wa na makaila kanako.
Ang bughaw’ng mga mata sa langit
midiyong kay dugay nang wa makakita kanako.
Agi pagbalik ning daang baybayon,
naghimo ako og bag-ong mga tunob.
Pagpahinumdom pag-usab sa akong mga gibiyaan.


26. Kataposang Panamilit

Wa na akoy dugang pa’ng ikasulti.
Kay wa nay mga pulong
nga makahawid pa kanimo.
Nabugto na ang atong lugway.
Ug nalubos ug wa nay makabadbad
sa hugot nga baliktos sa imong panamilit.

-- URIAS A. ALMAGRO
New Berlin, Wisconsin, USA