kalendaryo

Kanunay kong’ gatuo nga ikaw usa ka aksidente. Sama sa mga bag-ong dapit nga akong makaplagan pinaagi sa di ko pagsalig og direksyon, o basin sama ka sa di magkapares 
nga tsinelas nga akong gisul-ob karon gumikan sa kanunay kong pagdali-dali. Ikaw pod 
ang sayop nga tambal nga akong giinom kagahapon, maong naglabad ang akong ulo, 
nabikog ang akong tiyan, naglumbaanay og pitik ang akong kasingkasing, ug naglain 
ang akong gininhawa.

Usahay, sa dihang aksidente nakong mantan-aw ang akong kaugalingon sa samin, naa ka.

Hangtod karon, nagtuo gihapon ko nga ikaw usa ka aksidente. Sama sa pagkadiskobre 
sa penicillin, o basin mao ni ang nabati ni Magellan sa dihang nakita niya ang mga isla 
duol sa Pasipiko. Kahinumdom ko, nasuwat nako ang imong ngalan sa akong notebook 
nga adunay daghang mga kalendaryo, mga petsa nga kinahanglan nako di makalimtan. Gisuwat nako didto ang imong ngalan. Apan sa wala pa kana nahitabo, gipahiluna nako 
ang mga tuldok nga walay hinungdan, apan kon imo ning subayon, imo diay tong ngalan. Gisuwat nako imong ngalan diha sa kalendaryo, aron unta sa tunga-tunga ining mga petsa, aksidente kang magpakita.

-- CINDY VELASQUEZ

Cebu City, Philippines