tagawtaw atol sa pagtumaw sa perigee moon

Nabuntagan ang hubag sa imong aping.

Unya, tugbang sa banagbanag,

gapahipi ka likod sa panganod

atol sa patabok nimo sa pikas tampi.

Bisan ang langit niyunyon kay bug-at pa 

sa adlaw ang imong paghupong.

O, di kayha buot ka mohanggab sa hangin

dinhi sa bayabayon mao nga gapaduol ka

sa ginukdanay sa mga bawod.

Talagsaon ang imong pagtukaw,

napukaw mo ang nasalikway 

nga damgo. Diha sa kasadpan, 

nabuak nimo ang gihambin ko 

nga gugma sa kangitngit. Karon, 
Gakson ko ang tibuok-adlaw nga kahayag.

-- DENNIS S. SARMIENTO

Maryland, USA