pagpanaw sa kapulongan

Tanang buot kong ipadayag kanimo,

pil-on ug ipalawig nako sa balod

sa imong pagtagad. Wa'y laing mogiya ini, 

gawas sa hangin nga gakino gikan 

sa gadag-om kong dughan.

Sanglit wa'y timailhang masundan,

bisa'g kidlap lang sa bituon,

hagbay ko rang nadawat ang matuod

nga duha ra gyo'y paingnan

ining talagsaon nga biyahe--

inig dunggo sa akong kapulongan,

kanang kahabog sa imong dughan

moulbo ug mopalugdang sa dag-om lakip 

sa ubang paaboton--duna'y gibug-aton 

nga sarang mopaunlod ning tanan 

sa gilawmon sa kawalaan.

-- TON DAPOSALA

Cagayan de Oro City, Philippines