pahubog-hubog

naay mga gipamulong nato

sama sa tagawtaw nga hinubog

pwerti gyod nimong likay-likay

sa akong pangutana kon 

nakatagay ba ka atong usa 

ka gabii nga gihagkan ko nimo 

ug niadtong higayona wala ko 

mingbalibad tungod kay kuno 

ganahan kaayo ka nako 

ug karon hingpit ang akong

paglimod ug pagpanalipod

nga hinubog ra pod kining

akong pagbakho-bakho

apan bisag kabaynte pa ta

napislok sa dalan

ug nabalintong sa kanal

kitang duha nasayod gyod

kon unsay labing tinuod

-- ADONIS R. ENRICUSO
Dumingag, Zamboanga del Sur, Philippines