pag-ihap

Ayaw na lang ihapa ang balas 

sa baybayon sa imong pag-inusara 

kay dili ka makatumbok

sa gidaghanon niini, sama ra 

nga wala ka makaihap kon kapila 

nabasa imong mga aping sa higayon

nga ikaw nadugmok.  

Apan kon makahigayon ka'g daitol 

sa imong dunggan sa akong dughan,  

suwayi kuno'g ihap ang hinagubtob 

alang nimo. Unta makataghap ka

sa dahunog sa taob kon wap-a 

mabungog sa katahap.

-- KEVIN A. LAGUNDA

Lilo-an, Cebu, Philippines