Pilok na la'y malihok ni Magellan
Sa naminhod niyang lawas. Pastilan,
Ang tawo gihabolan na sa kabugnaw
Samtang nagkaawop ang panan-aw!
Nabati na niya ang karaang sonata
Nga awiton kaniadto sa iyang Mama.
Nihampak sa iyang aping
Ang nagkadugo nga mga balod
Ug nahalingi siya kanimo, Olango.
Nasangit sa imong kabakhawan
Ang iyang panumdoman.
Sa aso nga nagiliyok
Sa imong kahanginan
Siya nagkanayon:
Ah, nagtak-ang nag pamahaw si Mama
Nianang bahina sa isla.
Magdali ko sa pag-uli
Aron mohigop og sabaw sa init nga tinuwa
Sa dili pa mopahulay sa dako nakong kama.
Wala ni masaysay sa imong kaagi,
Olango! Apan bisan pa man niini,
Samtang gaaginod ang kataposan
Mapasalamaton kanimo si Magellan.
Lapu-Lapu City, Cebu, Philippines
No comments:
Post a Comment