pasko han tuig dos mil trese, waray bata nga nangangaroling ha villa de san juanico, barangay bagacay, tacloban

Ginlam-ud han balud. Diri ngani,

nahanaw ha kawarayan an kabataan.

An ira gudti nga mga tudlo

nangapyot ha riles han alad o alkuba

o sapayan han balay, nangapyot antis

hibul-iwan han mga kamot, nangapyot

antis gindagit han dulok.

An nahisalin nga kabataan, diri

nagawas hit gab-i, nahadlok

kun ano nga bugawak an dara han kasisidman.

Siyahan nga Pasko kahuman han kalunod,

waray bisan usa nga bata

nga nangangaroling ha dalan.

An nababatian ha kagab-ihon

an rusmak ha baybayon

han nagtitikahirani nga dagat.

-- JANIS CLAIRE SALVACION 

Tacloban City, Leyte, Philippines