usa ka sugyot

Ayaw'g tunla ang kasakit

kon uga ang imong tutonlan;

hunari usa og bali usa ka lad-ok

nga laway padakin-as paingon

sa imong dughan--

kay kon dili mo mabuhat

ang gisugyot sa albularyong buta

dili mo usab makita ang kamatuoran:

gikinahanglan sa mga kasili

ang tubod nianang kawayanan 

aron makigbayle sa mga hait 

nga bato sa kasapaan.

Ug kon imo gihapong tunlon

ang tumang kahapdos (kay matod mo 

ikaw ulipon sa kaugalingong kusog),

nan, iampo sa mga diyosa 

sa balete nga dili ka na mabukog 

ning higayona kay mismo ang misay 

nangyam-id na ug nangandam

nga mokawras sa imong tutonlan.

-- JOVANIE B. GARAY 

San Isidro, Davao Oriental, Philippines