1.
Mga banakon nga daw hut-ong sa nagbuntalid
nga mga anino nga gapatong sa pigura sa imahe
sa demonyong putol og sungay.
2.
Unanong estatuwa nga nagsakay sa elepanting
habog ang mga tiil; usa ka artesanong
bulawananon ang oten ug ang lagay gun-ot
daw mapa nga salin sa pagbaybay
sa arkipelago sa pat-ak-pat-ak nga panganod.
3.
Ang gipiyong apan gaaliraw nga mga mata
pagkadagawon sa mayam-irong langit nga
modalit og itom nga dagway diin nanamin kini
sa tubig; mao kini ang hubad sa damgo nga
mitiklop sa dihang miuylap ang kagabhion.
4.
Ang mensahe sa mga anunugba nga mikagiw
sa kapunawpunawan usa ka tilimad-on nga
mihagtos na ang hinanaling kagabhion. Punto na
usab aron pamation ang yamog sa pagsubang.
5.
Apan ang bugtong katigayonan nga hayan
untang angkonon sa mga gangis gisakdap
sa agila nga may bangaw nga mga pako.
Ang nag-arkong taytayan nga wa maski
kinsang linalang sa kalibotan ang makalabang,
nagun-ob sa usa lang ka labtik sa daotang
tawo nga nahidagsa nianang buntag diin
nagpilit pa ang muta sa mangungumpay.
-- LEONEL QUILLO
Malalag, Davao del Sur, Philippines
No comments:
Post a Comment