labada

Kabug-at sa imong mga kamot. Sa planggana, 

unsaon kaha nako paggginhawa? 

Sa imong pamati, gilok 

nga gisubay sa imong mga tudlo 

ang akong pagkakum-ot. Apan, napaksit hinuon, 

nakamrasan. Gibali-bali, gibanlawan 

daw latos sa akong kalawasan. Gikumot- 

kumot, gipuga, gipaspasan pagkuso- 

kuso sama sa pagkiskis og mga bato hangtod 

niawas ug nahupas ang mga bula. 

Di ba, bisan pa’g usa ra ko 

sa imong mga bulingon, ngano man 

nga kanunay ko nimong sul-obon? 

Apan bisan pa’g ang kainit sa usa ka 

halok mabati nako sa imong panit, magpabilin 

ang akong kalangto ug magbalik– 

balik ang mga mantsa. 

 -- IVAN RIDGE ARBIZO 

Davao City, Philippines