pag-ugmad, paglaom

(alang sa mga mag-uuma sa Davao Oriental) 

Subay niining dalan-dalan sa atong kamot 

kining yutang tabunok sa atong panglimbasog, 

gituboan sa mga damgong naingo’g 

wa’y kapuslanan—kining giumol 

sa mga gingi sa atong mga tudlo naghulma 

og kalibotan ibabaw sa atong palad. Ang wa’y bili 

bililhon diay bisan gabitay ang yugo 

sa atong li-og: ang pagtulo sa singot gikan 

sa atong tangkugo, ang pagtuhop ini sa yuta, 

ug ang pagturok sa kahoy hangtod mananga, 

mangudlot, mosupang ang kalunhaw nga unya

alirongan sa di-maihap nga alibangbang. 

 -- JOVANIE B. GARAY
San Isidro, Davao Oriental, Philippines