Gipili ko na sab ang window seat
sa airbus nga akong gisakyan
gikan nagdali-dali pag-apas
dihang balik-balik nang gitawag
ang akong ngalan.
Ang bintana sa akong wala
nakapahanap sa mga dalan
nga daw pisi na lamang
gikan sa akong gilingkoran.
Ang mga eskina sa kagahapon
sa atong panag-uban
usa na lamang ka linya.
Ang suga sa pako sa eroplano
niining kilumkilom
usa na lamang sa mga aninipot
nga saksi kanatong nag-inat
sa nagkanihit nga oras
sa milabayng gabii.
Ingon niini ang esksena
sa pagbiya, apan pugson ko
pagtambo ang kagahapon
dinhi sa lingin nakong bintana.
-- JAE MARI D. MAGDADARO
Binaliw, Cebu City, Philippines
No comments:
Post a Comment