nganong kuyaw ning manimuyo ta halayo sa kadaghanan

Delikado ning magpuyo duol sa siot nga katunggan, ilabi na kon senior
citizen ka na. Samtang magpahayahay ka sa imong tugkaran, nagsul-ob og
bag-ong inutaw nga T-shirt nga inalmirolan, usahay makakita kag bayhon
nga kalit lang moguho gikan sa nagkuros nga mga punoan sa bungarol,
hayan usa ka pugante. Bisan sa gilay-on, ug sa medyo hanap mong
panan-aw, maklaro mo ang usa ka sapsing tawo kansang kulongon nga
buhok morag gidihogag mantika, kilas ang tinan-awan nga mahadlokon
apan masupilon.

Usa ka adlaw, nadani gyod ka sa kaikag ug nakahukom ka pagsum-ok sa
dagtom nga ginhawaan sa katunggan. Ang parat nga baho sa nadugta nga
mga dahon ug sa hinungaw sa mga bangag sa mangla masingo mo bisan
layo-layo ka pa, ug kini mosamot kahait kon mohapak ang hangin gikan
sa dagat. Apan ang labing nakadismaya mao ang mga timailhan nga diay
gihimong puluy-anan kining dapita: gisi nga sinina nga nagbitay gikan
sa bakang nga mga sanga sa pagatpat, mga buak nga tasa nga daw migitib
gikan sa lapok, lastiko nga nalambod sa paak sa amimihig nga
nagdudakpanay sa baha-baha, mga aluminum foil nga kinumot, lamesita
nga kulang og usa o duha ka tiil. Nakapamalandong ka sa kalinaw ug
kahilom nga imong naangkon human sa hataas nga pakigbisog nga
makalihay—dili kanunay malamposon—sa takulahawng mga gapasan sa pito
ka salang makamatay. Diha-diha gibati mo ang kahaw-ang ug kaluod nga
daw dungang tamparos sa wala ug tuo mong aping, ug sa makausa pa wala
kay sarang ikapangatarongan, Senyor. Mora kag nasakpan in flagrante
delicto nga nagkabayo sa imong katabang, o kaha gikawatag kuha og
video nga naggunit og sudlay ang usa mong kamot, samtang ang laing
kamot mapinanggaong naghuhapuhap sa imong upaw.


-- VICENTE VIVENCIO BANDILLO
Dubai, United Arab Emirates