panamilit nga gipasangil sa dagat

Ang taob mituhop sa gibinhod kong tikod.

Sa atong pagpauli, nagdamgo ako
nga sukad masukad
wala pa ako hiabting nag-inusara,
dili sa mga adlaw nga kudlitan
ang langit sa pako sa mga sayaw
nga walay pupanaganang mopatighulog
uban sa hangin.

Dihay pultahan nga mikalit og patim-aw
sa atong atubangan.
Midayon kita, walay tingog-tingog.
Unsay pulos sa mga pulong?

Apan, palangga, gihasol ako
sa dagat, sa dagat kansang kahilom
mikuyanap nunot sa kangitngit.

Ingna ko nga gihasol ka usab.


-- VICENTE VIVENCIO BANDILLO
Koror, Palau