“winged old man with a long white beard” ni odilon redon

Kon ang kalibotan way dapit nga kasak-an
sa imong kasakit, sayod ko nga tam-is
alang kanimo ang pagbiya. Andam na
ang imong mga pako, nga pinulbosan
sa anyil, apan ang imong kasingkasing
bug-at pa kaysa tumbaga mong mga tiil.
Dinhi niining likod nga bahin sa palasyo
diin way laing manulonda nga nahisalaag,
aduna kay katungod pagpaanod sa imong
kasubo. Maayong pagpanaw, higala.
Mangayo unta ko sa imong panalangin,
apan nagpanuko ko kay bisag unsaon
nakog suhid kanimo, dili ko mapiho
kon hain mo tapigi ang imong mga kamot.


-- VICENTE VIVENCIO BANDILLO
Dubai, United Arab Emirates