alang kang Le Douanier
Sulod sa usa ka labong nga lasang. Babayeng nahikatulog nagpauraray sa bukton sa yuta, ubos sa kawayanan nga gikapotan sa lunhawng mga bagon sa uway. Sa iyang kilid nagdagayday ang usa ka asul nga sapa, tin-aw, way hinaganas. Lalaki miguho gikan sa tuo. Nasayod siya nga hapit na mopatim-aw ang buwan sa walang bahin sa itaas sa kwadro diin adunay makitang usa ka tipak sa langit. Mao nga piyongon niya ang iyang mga mata ug iuli ang iyang dagang sa sakoban sa iyang buhok, unya moluhod. Dili siya malimot. Ang iyang likod motabon sa nawong sa babaye gikan sa mga tumatan-aw, pugngan niya ang iyang gininhawa, pasagdan niyang matagak ang iyang mga tudlo nganha kaniya, sama sa dahon, sama sa ulan, pasayloon unta siya ni Bathala.
-- VICENTE VIVENCIO BANDILLO
Dubai, United Arab Emirates
No comments:
Post a Comment