lamento numero diyes

1 

Ang yagpis 

nga busay—mga dalan-dalan 

nga nahitipas gikan sa langit—nalamba sa kilid sa pangpang ug milayat nga 

gakurog. 

Usahay sa akong likod 

adunay gamayng daob nga padayong midilaab sa ulan, diha sa mingaw niining 

abo. 

Dili na igsapayan, karon, kon alang kang kinsa kini gihaling, 

padayon kini pagsilaob, 

paghatag og kainit 

kang bisan kinsa nga mahiduol sa iyang dagaang, 

usa ka kahoy, nahisalaag nga hayop, mga bato. 

Kon nasinati sa usa ka tawo ang gugma, 

(bisan kausa lang, basta gugma), 

kini modilaab sa kahangtoran 

tungod kay sa himatyong kalibotan, sa usa ka tumpi sa bukog 

nga natumog sa dugo, adunay miduslit niini. 

2 

Nasayod ko nga dakong kabahin sa akong kinabuhi nahimong 

walay hinungdan; nga dakong kabahin sa kinabuhi sa matag usa kanato 

nakawang lang: nga kadaghan unta 

sa atong mahimo o makab-ot 

apan gipugngan kita ang atong kaugalingon 

tungod sa kahadlok 

o sa damgo nga usa ka butang lamang ang angay natong mahimo o makab-ot 

o sa pagtuo nga ang tugob nga kinabuhi 

anha subaya sa tulugkaron—lahos sa tinakpang pultahan sa inayrang agianan. 

Apan usab miturok sa akong hunahuna 

nga walay butang nga nasaghiran sa pangandoy nga makalingkawas 

kanato, makapahilayo kanato sa hangtod 

lapas sa kataposang aligato sa agtang-lampara sa kait-on. 

Ug katin-aw uyamot sa hangin samtang taliabot pa ang kilumkilom. 

3 

Kini ang ikanapulong balak 

ug kini ang kataposan. Tukma lamang, 

sa kataposan, nga ang usa 

ug ang siro 

magkuyog paglakaw, 

mag-inagbayay ngadto sa ngilit niining pahina, 

usa ka linalang nga mipanaw kuyog sa kahaw-ang. 

Ang hangin mohuros 

lagbas sa usa ka dahon, bukog sa apapangig, 

uhot sa dagami. Unsa man ganiy 

motuyhakaw gikan sa yuta, usa ka adlaw niana, sa kataposang adlaw, 

makaamgo 

unsa diay ang bation sa linalang nga gasaloma. 

4 

Ang pagkakataposan 

maoy pagkamadan-agon. Kini maoy pagkamadan-agon 

nga galangkob sa tanang nangaging pagkamadan-agon. Kini maoy motapos 

hangtod sa kataposan. Kini maoy molungtad. 

Ug sa dihang itugyan na niya 

ang paglungtad, wala ug wala nay 

mahibilin, 

sa taya sa dugmok nga mga kotse, 

sa samad sa gilangkat gikan sa lawas sa Mamamana, 

sa gabon sa sapa nga nangalimyon sa kahapo sa kabatoan, 

nangligdas ang mga patay, haw-ang, busdik, sa sinugdanan, 

ug puno na usab 

sa pangandoy ang gaunang tingog nga mihungaw sa ilang tutonlan. 

5 

Nakahinumdom ko sa usa ka konserto ni Bach, dugay na kaayo— 

ang nagpangidlap nga lawak 

sa hamiling mga ginang ug ginong sa katilingban nga walay kamatayon… 

Mipid-ok ang mga hagawhaw, 

giharian sa kahilom ang lawak, 

gihaklap sa biyolinista ang dili-matuis nga kasakit sa iyang bayhon 

nganha sa binuksang palad nga hinimo 

sa kahoy. Unya nagsugod ang musika: 

usa ka habohabo sa bagtok nga duga sa kahoy, 

hinurot ang kusog sa mga kwerdas sa pagpamati 

sa umbangol, sa lawasnong umbangol 

sa tanang daplin-daplin ug nagkadugong lanot sa atong kinabuhi 

nga nagdanguyngoy pa, nga nag-awit pa, gikan sa hiniwang tinai 

sa usa ka iring. 

6 

Ug kining balak, 

kon ato man kining tawgon og balak, 

o konsiyerto sa gabinugtong 

nga gipahat-pahat sa iyang kaugalingon, 

kining patidlom sa yuta nga layat sa parakaydista—ang mga ulod-hantatawo 

sa iyang likod nga galalik apan usab sa samang higayon gakitkit 

sa parakayda sa iyang gugma, kinsa kahay makaluwas kaniya, 

kining gapaday-ang pag-utaw-utaw 

kaniya nga midupa ingon 

nga molupad, samtang gituman niya 

ang kasugoan, unya natagak… 

7 

Sancho Fergus, Ayawg hilak! 

Apan kon gusto ka, hilak lang. 

Sa lawas, 

sa lagom ug bun-og nga unod, sa dihang 

gipabuy-od na kini, pangitaa 

ang gainusarang pulgas nga gakatawa. 

(hubad sa Iningles ni Galway Kinnell) 

-- VICENTE VIVENCIO BANDILLO 

Metro Manila, Philippines

balkonahe

The hour is larger and I more alone... 

Ayaw pagsandig sa balkonahe kon ikaw 

nagbinugtong (sumala sa insik nga magbabalak). 

Ang pihing nga bulan tupad sa laundok 

sa mga panganod 

daw sagabay sa damgo ug panghinaot 

sa ul-ol nga panumdoman nga gilikisan sa tambayawang 

anino nga nagbalay niining suok sa balkonahe, 

nga sa dili na matino ug mahinumdomang siglo 

kanunay ang pagpanghagtak sa mga balhibo sa 

napusngang langgam nga napitso og igo sa idlas nga bala 

nga walay kabhang. 

Ang lawas sa babaye nga gidihogan og lana 

nga tunlodanan sa gapas mga giagup-op nga panid 

sa karaang manuskripto sa dula sa bantawan 

nga nag-ulohang, Le Malade Imaginaire. 

Aduna’y duha ka nag-igdal nga rima 

nga ania mingtupad kanako niining balkonahe 

samtang ang kagabhion gipasundayag 

ang paglihok sa bulan ug mga panganod daw 

nanagkukabildong mga aktor sa tablado sa langit 

samtang sa awaaw nga dalan may pipila ka mga pagano 

nga giprosesyon ang ilang tambayawang Bathala, 

ug dinhi niining maong balkonahe, tin-aw 

sa akong mg mata nga may gisabwag 

ang mga pagano gikan sa ilang gikabibang 

dunot nga bayong: tilimad-on nga ako 

mag-inusara sa tibuok kong kinabuhi. 

-- LEONEL QUILLO 

Malalag, Davao del Sur, Philippines

basin ang kawanangan naa’y kinutoban

Dodong: Balik na, 'day. 

Habolan lagi ti ka 

og mga bituon. 

Inday: Unsa'y maayo 

og batoon ti ka 

og bituong himatyon?

Dodong: Ipaunlan nako 

sa imoha lang 

ang udtong-bulan. 

Inday: Makab-ot diay 

ang udtong-bulan 

sa putot og damgo? 

Dodong: Himoon nakong wapang 

nga binurdahan sa mga bulalakaw 

ang hapin sa atong kama. 

Inday: Kamao ka manahi? Sige. Sugdi 

ang mga natastas nga pangandoy 

sa imong liwat. 

Dodong: Tawagon nako ang hangin 

nga mohuni sa dayon 

nimong katulog. 

Inday: Sa bagay, yabag 

ra ba ka og tingog. Apil sab

ang pangisip usahay. 

Dodong: Tuhoi ko, 'day. 

Kawanangan sa akong kiliran

ang imong pagbiya. 

Inday: Taas pa ang kagabhion, 'dong.

Sukda ang kawanangan. Basin 

diay naa’y kinutoban. 

-- DELORA SALES-SIMBAJON
Butuan City, Agusan del Norte, Philippines

ritwal

“I come to speak for your dead mouths.” 

-- Pablo Neruda, The Heights of Macchu Picchu 

Idugsak kanang nagkadugong 

plamingko sa akong dughan. 

Lungkaba kining gakisikisi pang 

kasingkasing, ug ihalad 

diha sa altar. Ilabay 

ang ngamig kong lawas 

ibabaw sa daob iyawat 

mapawong ang kaligutgot 

ni Veracocha. Pasagdi 

ang unos nga mobanwas 

sa kalangsi sa pag-antos.

-- RODELIO BARELLANO 

Caloocan City, Metro Manila, Philippines

videoke

Nindot og tingog. 

Sakto sa tayming ug tono 

apan gamay’g grado, 

gibato pa’g kamatis 

diha sa entablado. 

Ang nindot og tingog 

wa kapiog sa kontrang 

mora’g nakaigit dihang 

nibirit. Pataka la’g sulod, 

gabudlot-budlot ang simod 

daw esol sa pabo 

ug bisag nasaag sa tono 

Gatos ang porsyento 

ug dungan sa kombo, 

You are a perfect singer! 

Namakpak, nanayaw pa 

ang nanan-aw. 

Ni-request og laing birit. 

Nangapil og kanta. 

Pwerting yabaga!

Nadunggan sa tibuok 

kalibotan. Mga tawo tanan 

natakdan. Nilanog-- 

mga yabag nga tingog. 

Nibandabanda 

sa mga planeta 

ug nagkalainlaing

solar system. 

Mga UFO nanglupad. 

Mga bituon nakay-ag. 

Ang syagit sa mga alien 

lanog pa sa dalugdog, 

na-pick up sa mikropono. 

Gatos ang porsyento 

ug dungan sa kombo, 

You are a perfect singer! 

-- JOSUA S. CABRERA 

Liloan, Cebu, Philippines

syaok sa mga uk-ok

Usa niana ka udtong tutok 

Nga sa katulogon ako nahinanok 

May mga nagkukuratsang tingog 

Nga sa akong utok mikulitog: 

“Ayaw baya ninyo ika-itok 

Ni kasilagi kaming mga uk-ok;

Ayaw intawon kanamo ihan-ok 

Ang inyong mga pagtulisok. 

Buot lamang kaming mosuksok 

Sa kaharuhay sa mga suok, 

Buot lamang kaming molad-ok 

Sa kahumot sa kalibotang dubok!” 

Dili kuno angayng ikahadlok 

Silang tinamay nga mga uk-ok, 

Dili baya kono silay nagtilok 

Nianang bahandi nga nagdasok. 

“Dili kami tinuorayng dukirok! 

Dili kami ang tinuod nga sirok! 

Ania lang gani tawon nangluklok 

Sa mga basurang nagpunsisok. 

Ug nganong dili ninyo ibalitok 

Ang kayugot sa mga Alimatok? 

Di ba sila ang tinuod nagsupsop 

Sa katigayonang naglunop?” 

Ug sama sa manok nanuktugaok, 

“Dungga kining among syaok! 

Kaloy-a tawon kaming mga uk-ok! 

Dugmoka kanang mga Alimatok!” 

Sa kakurat ang utok ko natiurok, 

Samtang ang ulo sa unlan nabagdok, 

Naputol lagi ang akong paghagok 

Ug mibahakhak ug miaguk-ok… 

-- DON PAGUSARA 

Davao City, Philippines

tan-awon ta kon makapasar ba

1. Mag-agas ang gatas ug magbusagak ang dugos diin gilunopan og kabituonan ang damgo. Tinuod o bakak? 

2. Ang lawod 

a) usa ka kauhaw nga habog pa sa galimugmog nga dugdog. 

b) bulawanon ug suwaw sama sa "waves of amber grain… from sea to shining sea.” 

c) gasuyop sa tanang gamot sumpay sa pusod. 

d) tanan anang naa sa taas. 

e) wala anang naa sa taas. 

3. Pun-a ang blangko: Duha ka galumbang busay ang mga ____ kon sanapan na ang dughan sa _______ ug kalaay. 

4. Unsaon paglakaw ibabaw sa tubig? 

a) Molayat subay sa puti nga pamaagi. 

b) Magtuong alas ka, hukasan ra bisan ang huyohoy sa Alaska. 

c) Moluhod samtang pun-on ang balikbayan box og mga pinilian gikan sa garage sale. 

d) Pilo-piloon ang usa ka dolyar, pormahong eroplano. 

e) Mokalawat sa gisangyaw sa ganganga nga bulsa: E pluribus unum. 

5. Sa lima ka puntos, ipasabot nganong wa’y kutas nga tultolon bisan ang kinalay-an nga Asian store, ug nganong ang kasingkasing haom usab sa plastik nga gipustan sa kinaham nga buwad-pinikas. 

6. Sa lima ka puntos, pagpaanod-patinghaya sa bul-og niining balita (NBC News, Oct. 18, 2021) hangtod maunlod ug madugmok ka sa kataposang tuldok: “After Hurricane Ida ripped through New York City, Hongsheng Leng was found dead in his flooded basement apartment at noon on Sept. 2. The bodies of his wife and daughter were discovered later that same day… Nearly all of the 11 New York City basement-flooding deaths were residents of Asian descent who lived in below-ground dwellings that were particularly susceptible to storms.” 

7. Dili ka makataak og lapok, dili madakin-as ug maumod sa labing lunhaw nga sibsibanan diin tigion ka sa mga baka. Tinuod o bakak? 

-- MICHAEL U. OBENIETA 

Topeka, Kansas, USA

ran, tan-awa ang mga kabalyero

Ran, tan-awa ang mga kabalyero 

galinya sa daplin sa karsada: 

pula kaayo ang ilang mga bulak, di ba? 

Kapula sa kalayo nga misilaob 

ubos sa nagbuntaog nga mga panganod. 

Gihalingan ba kaha sila sa mga kumyulus 

nga nag-alirong sa ibabaw? 

Ang mga bulak sa kabalyero nakig-indig 

sa kapula sa imong bayhon, 

sa imong gamay, sihag nga payong nga misalipod 

sa imong lawas ug anino nga labing maunongon, 

wala gyod mobuhi sa imong kamot; 

imong saninang pula nga leys mibukad gikan sa hawak, 

dakong gihay nga mibukhad gikan sa sanga. 

Tan-awa ang mga kabalyero-- nag-alintabo, 

may salag sa bidlisiw nga gitungtong 

sa sangang gisilaban sa adlaw-- Unsa kaha’y bulok 

sa adlaw? Ambot, dili ta kaharong og tan-aw; 

dili ta kaagwanta og tumang kahayag. Kini, 

kini lang ang atong makita: usa ka hubad 

sa kahayag nga mitugdon 

sa atong mga mata, milapos sa atong panit, unod, 

bukog, nga mihimo natong tabunok sa mga porma; 

kining usa ka saysay sa atong kaugalingon 

nga mas maaghop, gaan, bantaw sa mga bulok, 

wala magkinahangla’g mga handomanan o tamdanan 

sa dalan pauli sa atoa, gawas ning kabalyero 

nga mibitik alang nato og gamayng langit. 

-- ESTER TAPIA 

Nordrhein-Westfalen, Germany

tudloi ko unsaon paghilak og usab

ambot naa ba’y tambal sa kamingaw 

kay magparisita gyod dayon ko 

nakalimot nako unsaon pagdanguyngoy 

nga igong manghubag ang mata 

daw napaakan og lampinig 

kanang dunganan og tubod 

sa sip-on nga mowaswas og tagiptip 

sa gahuot nga dughan 

pinugngan na kining akong luha 

wala’y igong kusog pagkabkab sa gibati 

samtang gidulgan ko sa kalaay 

kini bayang kapakyas nako sa pagbakho

gabulig ra’g pagluom sa paglaom 

-- JONALYN ALMACIN-GOURDON 

Nantes, France

ang gilay-on sa santilmo

Ang init-bugnaw niyang siga 

gikan sa akong nahimutangan 

mihapi sa balhibo sa akong tangkugo 

kay matod pa: 

diha’y gikabsan sa gininhawa dihang dapita 

ug karon mipatim-aw ang salin sa iyang dugo, 

miduslit sa umog nga sampinit 

nga gidilaaban sa taligsik. 

Sa imong pagtutok, 

pundo-paniid sa matag gutlo,

ayaw’g suwayi pagpaduol 

kay kini mopalayo; 

ayaw og dagan kay kini mopaduol kanimo 

kay matod pa: 

wa’y bantogang propeta nga nasayod 

kon kanus-a kini mapalong. 

-- JOVANIE B. GARAY 

San Isidro, Davao Oriental, Philippines

horeb

Sulod unta 

sa hunahuna, apan 

tuyoonon. 

Ubay-ubay 

ang mga agianan. 

Liko sa tuo. Aginod 

sa wala. Usa na usab 

ka liyok padulong 

sa gahagdan-hagdan 

nga mga bato, sumpay 

sa panon sa mga kwaknit 

nga gililo sa liboan 

ka mga unos. Apan, 

wala ikaw dinhi. 

Usa ka lakang 

nganha sa gabukal 

nga lapok. Mga pananglit, 

mga pasumangil nga 

gidangdang sa kalayo. 

Gapaabot sa pagkibhang 

sa higayon, sa imong 

paglabay. Apan, 

wala ikaw dinhi. 

Sulod dinhi, wala’y asoy 

ang nasaag nga huyohoy. 

Wala’y dagway ang mga 

udtong tutok. Busa, ania, 

gakubkob na usab og langob 

sa ilawom. Ningsaghid ang sidsid 

sa usa ka huni, sa berso— sa yuta 

nga maangkonon. Sa gihapon,  

wala ikaw dinhi. 

-- CORAZON M. ALMERINO 

Los Angeles, California, USA

kamatayon gikan sa kamatayon

Usa ka bakikaw nga gabii niana gipadamgo ko 

sa mitaliwan nakong amahan nga 

nagtungtong sa suwang sa pangpang. 

Nagtambo siya kanako nga nahimuot apan 

nahulpa ang iyang sag-ang sa iyang 

pagbahakhak ug nangapal-ak ang iyang panit.

Usa ka kandilang hilis. Sa padayon 

nga paghangad nako niya, natud-an ko 

sa iyang lukonan ug gikuhit nako 

ang akong agtang apan dali kining mibantok. 

Nanimaho kining dugo. Duna'y misitsit 

sa akong luyo ug sa akong paglingi, gisuyop ko 

sa huyong-huyong: ang akong anino. 

-- KENNETH MICHAEL M. BABA 

Borbon, Cebu, Philippines

hekasi

Niadtong hapona, gipadayon 

ni Sir ang lektyur bahin 

sa mga pamuno sa Pilipinas. 

Igo-igo ra gyod ko nakaapas 

kang Aguinaldo ug Macapagal 

niadtong miaging semana. 

Ug halos naminhod 

ang akong kamot sa pag-alsa 

sa lingkoranan. Gihunghongan ko 

sa akong klasmeyt bahin sa tanang 

gipangdiskas sa wala pa ko 

siloti sa maestro—nag-oratoryo 

si Sir bahin sa kalamboan 

ug kahapsay sa Bagong Lipunan. 

Sa dihang naglanog ang pangutana 

bahin sa “Gingharian sa Maharlika,”

nasapnan niya akong pagduka. 

Gipukaw ko sa akong mga klasmeyt 

ug gidiretsohan ko niya'g pangutana 

kon unsa nang matang sa gingharian. 

Blangko ang akong nawong bisan tuod 

nagkuyamod ang simod ni Sir ngadto 

sa mapa nga gipilit sa blakbord. 

Pakapinan pa'g tudlo sa pamilyar nga mga isla. 

Nag-inusara og pungko taliwala sa 

China, Malaysia, Indonesia, ug Thailand. 

“Tonto, do you not know what this is?” 

Nakusog ang tingog ni sir. “Iro nga gikapon… 

Nagpasuso sa agalon?” Mitubag ko, 

nanghuy-ab. Unya kon Iningleson pa 

ang sunod nga panghitabo, 

the rest is history. 

Halos magkinse na ka minuto 

ang akong pag-alsa. Naghilom- 

hilom ang mga estudyante 

samtang nagpadayon si Sir 

sa iyang pagkabanha. Dihang gisublian nako 

og tutok ang mapa, nakaingon gyod usab ako 

sa kaugalingon: mora bitawg iro nga gikapon. 

Sa tanang nakat-onan sa katuigan sukad 

niadtong hapona, natatak sa utok 

ang mga nawong sa mga klasmeyt. Igo lang 

nagtando-tando sa mga binutbot 

sa maestro samtang akong kamot 

nangugat pagkumkom-kumo. 

 -- TON DAPOSALA 

Cagayan de Oro City, Philippines

sa kalibotan kita sa daklit matahom: paghubad sa balak ni Ocean Vuong nga “on earth we’re briefly gorgeous”

I 

Sultii ko kabahin kini sa kahigwaos 

ug wala na’y yamo. Kay ang kahigwaos mao ang pagtahan

sa lawas kon unsa’y nasayran niini; 

dili kini makatipig. Nga kining dulaw nga kahayag 

napukan ubos sa laing giyera; 

ang tanan nagpunting sa akong kamot padung sa imong dughan. 

I 

 

Ikaw, nalumos 

                taliwa sa akong mga bukton— 

pagpabilin. 

Ikaw, nitukmod sa imong lawas 

                ngadto sa suba 

apan nabiyaan ra 

                uban sa imohang kaugalingon— 

pagpabilin. 

 

I 

Sultihan tika unsa kadako ang atong kalapasan aron kita mapasaylo. Kon giunsa ang usa ka gabii, gikan gidapog si nanay, dayong bitbit sa chain saw ngadto sa talad, dayon ang akong tatay padulong luhod sa banyo hangtod nadunggan namo ang hilom niya nga pagngaab lapos sa paril. Ug busa akong nasayran— nga ang usa ka tawo sa kinapungkayan maoy pinakaduol nga butang aron motahan. 

I 

Iasoy ang pagtahan. Iasoy ang alabastro. Kurta. 

            Honeysuckle. Goldenrod. Iasoy ang otonyo. 

Iasoy ang otonyo bisan lunhaw

            sa imong mga mata. Ang katahom bisan pa'g 

adlawan. Iasoy nga buot kang makigpatay niini. Di mamanso nga 

             kaadlawon nag-usbaw sa imong tilaok. 

Akong paglabog ilawom nimo 

            daw sama sa usa ka balinsasayaw nga nibarag 

diha sa pagkahagba. 

I 

Kilumkilom: ang subad sa dugos taliwala sa atoang mga anino, nahubsan. 

I 

Buot ko nga mahanaw – nan akong giablihan ang pultahan sa awto sa usa ka langyaw. Diborsiyo siya. Dako pa siyang buhi. Nagdanguyngoy siya sa iyahang mga kamot (mga kamot nga daw taya ang lami). Ang rosado nga laso sa kanser sa suso nga anaa sa iyahang keychain nga nagbag-id sa ignisyon. Dili ba gitapion nato ang usag-usa aron lamang sa pagpamatuod nga ania pa kita dinhi? Dinhi nako sa makausa pa. Ang bulan, layo ug nikayab, nabilanggo sa kaugalingon nga lugas sa singot sa akong liog. Gipasagdan ko ang gabon nga nag-agas latas sa nasiak nga bintana ug gitabunan ko ang akong mga tango. Sa akong pagbiya, ang Buick nagpabiling galingkod didto, usa ka amaw nga toro sa sibsibanan, ang iyahang mga mata nagdangdang sa akong anino ngadto na sa kilirang bahin sa mga balay nga nahimutang sikbit sa dakbayan. Sa balay, gibalibag nako akong kaugalingon sa kama daw sama sa usa ka sulo ug gitan-aw nako ang dilaab nga nipahit sa balay sa akong inahan hangtod nigimaw ang langit, madugoon ug bulto. Buot nako nga mahimong sama sa langit — aron makahupot sa matag paglupad ug pagkahagsa gilayon.

I 

Litok og amen. Litok og pagbasol. 

Litok og oo. Litok og oo 

hinuon. 

I 

Sa shower, gipaningot taliwa sa bugnaw nga tubig, akong gibagnos ug gibagnos 

pa gyod. 

I 

Dili pa ulahi ang tanan. Ang atong mga ulo nga gialilingan 

            og mga tagnok ug sayo pa kaayo ang ting-init aron magbilin 

og bisan usa nga matang sa timaan. Ang imong kamot 

            ilawom sa akong sapot samtang ang istatik 

nagkakusog sa radyo. 

            Ang lain nimong kamot nitudlo 

sa rebolber sa imong amahan 

            ngadto sa kalangitan. Mga bituon nga diyot-diyot nangahagsa 

            sa crosshairs. 

            Kini nagpasabot nga dili ko 

mahadlok kon ugaling kita ania na 

dinhi. Daghan na kay sa panit 

makuptan. Nga ang usa ka batang lalaki nidulog 

            tapad sa laing batang lalaki 

kinahanglan mogama og usa ka umahan 

            nga puno sa tagiktik. Nga ang paglitok sa imong ngalan 

mao ang pagpaminaw sa tingog sa mga orasan 

            nga gitakda pagbalik sa laing takna 

ug sa buntag gakaplag sa atong mga sapot

atubangan sa pantawan sa imohang inahan, ang pagkapakapa 

daw sama sa usa pa ka semana nga mga liryo. 

-- GERWIN VIC E. BHUYO 

Bangkok, Thailand

mga uhong

Nahibulong kaayo ko sa talagsaong pagpanubol 

sa mga duwendeng payong katag ning mga bungdo 

sa mga sulom hulmigas ug aliling: 

daw ihas nga mga tisas nga gipang-ugbok sa mga diwata 

sa mga ap-apong pisara sa tulonghaan ning nangihing 

kamot nga nagdibuho sa mga buntag sa Agusto 

ug tambilagaw sa buwagaw nga Septiyembre… 

Ah, tanghaga o gumonhap ba kining paghugpa 

sa nagkulukabildong hinuktok sa gatuktok nga 

taknaan tadlas o lagbas sa libo ka libong 

minilyon ka mapangutan-ong tiktak 

sa napuling pukling mga gutling? Ngano? 

Ngano ba ugod nga dinhi niining 

naghulahulang muto nanghimatiis man kining 

mga inanong ugis inigpangalibwag sa mga diyoling 

yamog sa banagbanag sa Oktobre? 

Sahi sa pagpanurok ug pagpanlipang sa mga lunhaw 

nga pinugas nga gisabod sa nanagpiyakpiyak 

nga mga piso sa kinaiyahan sama 

sa mga bungag-singot sa iyang aping. 

Kayha kining nagtinabuylog nga dakong pangukit 

nga nanampiling karon sa tamboanan niining 

mga mata dili gayod masabtan, dili matugkad 

niining nanagpayong nga mga uhong 

sa Agusto, Septiyembre, Oktobre… 

-- MELQUIADITO M. ALLEGO 

Walker, Louisiana, USA

patik sa propeta sa mamumulong sa magsasaysay

giyabo mo 

ang mga tudlo 

nga nidumala sa mantalaan 

ug gilumsan mo 

sa tinta 

ang mata'g baba sa sibyaanan 

gipilo-pilo mo 

ang pluma 

sa akong nasaksihan 

aron magisi-gisi mo 

ang libro 

sa tanan kong pamatud-an 

gipapas mo 

ang mga titik 

sa akong kaugatan 

ug gikurisan mo 

ang hugpulong sa akong galamhan 

gikulit mo 

sa lapida 

akong ngalan sa kahanginan 

apan sa hangin ra 

mapatik nimo 

ang pinintal mong kasaysayan 

-- DESIREE L. BALOTA 

Talisay City, Cebu, Philippines