sama ra sa pagtilap
sa dila sa mga bituon,
sama ra sa paghunahuna
nga ang buwan mao ang adlaw,
sama ra sa pagsuwat
og love letter
nga naughan na sa itom nga tinta,
sama ra sa pagyango-yango
ngadto kang Manang Pandang
nga nagpapalit og ginamos
bisan og wa kasabot,
sama ra sa pagbasa
sa bibliya
bisan og buta,
sama ra sa pagdakop
sa ngiyaw sa iring kabang,
sama ra sa pagluok
sa uwang
sa kubol nga iro,
sama ra sa pagsagpa
sa makapalinog
nga hagok sa hubog,
sama ra sa pagpatim-aw
sa limpiyo na nga tubig,
sama ra sa pagdagan
sa kadagatan
sa isla sa Mactan,
sama ra sa pagpabarog
og monyumento
nga way dagway
ibabaw sa huyonghuyong.
sama ra sab sa pagwali
sa pari og puti
nga kaluwasan
bisan og nasaag ni
sa iyang kodigo nga panumdoman.
-- KEVIN A. LAGUNDA
Mandaue City. Cebu, Philippines
No comments:
Post a Comment