pautanga ko

Pautanga ko bi,
dayon-
ilista lang sa tubig
ang akong mga utang
nga agi na lang og tabang
kay lisod karon
ang panahon
daghan kog gipakaon.

Unya, paghulat og usa ka tuig
kay di baya ko ka-afford
anang "four gives."

Ang presyo karon sa bugas
nigukod nas gatas;
ang uniporme ni inday
gisi na ug naglaylay;
ang bawon intawn ni dodong
mais ra og gunggong;
ang abang sa among balay
og bayranan sa koryente
sumpay nas akong tinai

Pautanga ko bi,
unya ilista lang sa tubig
ug hinaot pa unta
nga moulan og taman aron
kining labad sangatanan
kini bang akong utang
dagiton sa sulog didto
sa ganghaan
sa ginoong nahinanok
o dili ba kaha molugdang

kay lamuyon sa
sapang ligdong.


-- MARIA VICTORIA BELTRAN
Cebu City, Philippines