Kaning mga litrato didto kuhaa
sa may karaang pier sa Argao.
Sais anyos ko aning gabatingsyut
gamug-ot kay hait ang mga kabhang
sa kinhasong nalingkoran sa balas.
Hala, nakuhaan diayg hulagway ni Papa
kaming magsuon tungtong sa batong kaluha
dinhi baya mabitik akong ilong sa pingwit
sa akong magulang si anhing Pepe.
Ning laing hulagway naglaray ming mag-agaw
tapad sa lambayong nga among i-skiping rowp
kanang mamisita gani sila gikan sa Sugbo.
Nia say mga bag-o-bag-o kay nagguroy na kog
bebeh nga nahadlok og langoy
iyang bukong dala ikabo sa dagat parat.
Kami sang magtiayon nangitkit ani og barbekyu
sa karaokehang Red Tomato sa kilid sa pier.
Wala makuha sa retrato
ang daghan pa namong kalingawan tungod sa pier:
pag-ambak-ambak inigtaob ug inighunas
panguhag kinhason balat ug tuyom
panggukod sa agukoy sa balas
pangitag alukabhang himoog kwintas
balay-balay ginamit ang gapnod ug lukay
lumbaanayg langoy gikan sa lapyahan.
Karon ang karaang pier sa Argao
dili na palangoyan kay nagkadaiya
ang mga putos, laya, ginisi, upos.
Kinsa may ganahan rong modalikyat didto
labi na sa gabii gitirador man ang bombilya
diha poy adik diri nanglugos og dalagita.
Dili na man sab managdula ang mga bata ron
og tubig-tubig, hulbot-bitok, sung-ay-sung-ay.
Apo namo karon nga taga-syudad
wala ug dili na makaila niini kay nagsige lag
yampungad sa Paw Patrol ug Pokemon
ilang estante may lain-laing klase sa dinosaur.
-- ERLINDA KINTANAR-ALBURO
Cebu City, Philippines
