lanog ang biga sa balak

ang igik sa mga kwaknit nga titik 

gaagulo ug gaalingawngaw sud 

sa ngiob nga langob nga imong 

nasayran dinha taliwala sa gabilangkad 

nga wanang sa awaaw ug adunay 

gatubod nga mga birigong pulong 

gaalo sa imong pagdayon nganha 

sa gahilom gainusarang piniriso nga  

danaw gapaabot sa imong linog 

mopakagay mopadagayday mobungkag 

moyagaw sa gasinaw nga tubig nga 

giuhaw sa hapyod ug hagawhaw 

gikan sa imong kinatibuk-an 

suwati na ang naminting lagusa 

-- TEA SOLON 

Mactan, Cebu, Philippines

kusnit sa bugan

gikinahanglan kini 

matod pa sa akong inahan 

aron kuno dili magpatuyang 

ug magpaturagas 

og latas tipas sa 

tarong nga dalan 

ang kusnit sa bugan 

nga pinakatay 

sa panumdoman 

mas dugay kuno 

ang lahutay 

kuno mas taas 

ang lunit labi na 

kon hait ang kuko 

mas sakit ang ping-it 

ambaw lang gyod 

unsa katinuod 

napawot nalang kining 

akong kunot sigeg

hapak huwaphuwap 

sa nagsilaob nga hapdos 

morag nagpatay og 

kayo taliwala sa kaudtohon 

molugnot ra gihapon 

padayon og dagan didto 

sa dakong wanang 

wa’y kat-on kat-on 

 -- TEA SOLON 

Mactan, Cebu, Philippines

mga lusa ni unga

naglataylatay naglaray
lupig pa'y hinayhay
nagkamangkamang

bisan punay og kuskos

dili matangtang ang kablit 

hangtod kilkilon og taman

subaya ang linya

biraha matag usa
aron maganid og tangtang
mahimo pod gamitan og suyod

nga tinagoan sa kaban

sa katigulangan

suyod dinhi suyod didto
asoy diri libak didto
hangtod mahanaw

ang kakatol sa ulo

kilkil diri kilkil didto
irok diri irok didto

tagsatagsaon gyod paghubit

walay undang ang ganid
labi nag gapainit kanunay
hangtod sa daplin pagkatulin
sa mga simod nga patangkugo
ang lagapak sa libak

-- TEA SOLON

Cebu City, Philippines

hunong na intawon anang panampiling

(tubag sa balak ni Vinni)

Sirad-i ang bintana. Undangi na

ang wala’y kahumanang pag-apong

sa hilom. Ania’y maso, o! Hala, gub-a
kanang bintana ug apila pagpulpog

ang mga suok nga sementado. Imbis

nga tuoban sa imong mga bakho

ug panghupaw, maayo pa hinuon

lungagan lahos sa kabag-ohan. Dia pa’y

dos por dos, gabas, mga lansang

duyog pod sa imong pagpalanog

sa kanta ni Bon Jovi: It's My Life…

Hala, pamanday! Kulkoga pod

kanang gabundo nga pinuy-anan

sa mga anay ug pukyotan

nga ningsiwil nianang mangtas

nga bintana. Himoa nang pultahan!

Ug unya dayon, kon manuktok man

gani siya’g kalit ug manangpit

pag-usab sama sa uwang sa tungang

gabii-- palihog lang ha-- pikati!

-- TEA SOLON                                                                                                                                        Cebu City, Philippines

dugay ra gilangkat

kining akong kasingkasing

gikan
sa nabugto nga hayhayan

dinhi sa lapad nga wanang


galakaw ko nga haw-ang sama


sa mga inahan igsuon asawa anak


nga gibombahan

galanog-lanog ang mga hinungdan


labaw sa paglaom kalipay kaugmaon

ug nagpabilin nga nagsilaub

kining
mga luyloy nga tiil

hinayhinay nga nagguroy nako

palayo dinhi diin padayon

ang gubat kon kinsay tinuod

nga ginoo-- langyaw sama

sa saag nga kalinaw

-- TEA SOLON
                                                                                                                                        Cebu City, Philippines

serapin

(alang kang Omran Daqneesh)

Tiwason yuna nako kining gibatil nga latik, himuon

nga kinaham nimong dulse. Dinha lang ka,

pagduwa og yuta.

Dia’y gamayng’ tubig ug kabo

nga hulmahan-- paghimo’g nindot ug dako nga balay;

lig-ona pagtukod ang haligi ug atop ha!

Ay, ayaw na gani’g kabalaka nako! Wala ra ning dugo

nga gatulo ug gadaligdig nga singot.
Tiwason ko ning galapot na. 

Na hala, ayaw na lang panumbalinga kanang gabuto.


Padayon dinha sa imong pagduwa.

Ayaw’g kahadlok.
 Kantahi, taghoyi lang.

Basin pa diay malubong
 ang mga ping-it ug syagit

sa gawas. Dinha ka lang, padayon sa imong pagduwa

ug pagpalanog sa arangkar nimong awit.

-- TEA SOLON
                                                                                                                                         Cebu City, Philippines

niyebe sa disyembre

tumong sa pagtakdol sa adlaw

nidaligdig ang niyebe

nga nagpas-an og aso

nunot sa sapa tadlas ngadto

sa dakong wanang

dili igsapayan sa nagkurog

nga mga dahon ang masusihon

nga hungihong sa hangin

namasin nga masayod

mahitungod sa imong pagduaw

sama sa punoan nga hinabulan

ug bug-at nga puting kabugnaw

uyuga unya ang kasingkasing

nga dugay nang ningkaging

sukad giunos sa kahapdos

-- TEA SOLON
Cebu City, Philippines

pagdiga sa baraha

Kini aduna na pod ba'y iduslak

nga tulo ka espada sa dughan

sukad nanukmod sa nangatagak
gikan sa nagdilaab nga tore?

Ay, taronga palihog pagsaksak 

ug paghulbot kanang tarot!

Ayaw na tawon ko itumpawak 

sa gipug-ok nga kaagi sa kasakit.

-- TEA SOLON

Cebu City, Philippines

alang kang aylan ug uban pa

kanus-a mohunong 

ang bunok sa mga bala
aron ugma dili na 

ang ulbo sa dagat 

ang mohabol lukop 

sa kahinanok tidlom

sa urom nga gahagwa

diha sa baybayon

-- TEA SOLON

Cebu City, Philippines

pag-agni

gakidhatkidhat

ang hawan sa papel

nga lanog sa kaputi

sa agik-ik

makadani

gapasopaso

ang gapatagad

nga mga pulong 

subay sa gakaduol

nga garay

-- TEA SOLON

Cebu City, Philippines

naunay, nikirig

Kaniadtong bata pa ta
daan na kong hingigo; daan na pod 

nga ikaw nindot kaayong ig-on.

Bisan unsaon nimo'g
hupo-hupo hipi-hipi hadla-hadla,
di ka gyod kaipsot sa pagtumong
sa akong luthang. Sa pagtira nako--pak,

kirig ka lagi!-- dayon ko'g bahakhak.

Dili na maihap ang mga panid

sa kalendaryo nga gibasa ug gibala
sa atong linuthangay. Apan ngano ba

nga sa tanto nako'g tira 

tupo-tupo sugsog tud-tod nimo 

sa lain, sa hilom ako man 

hinuon ang nalain?

Karon, di na kinahanglang ipangutana

kon kinsa ang tinuod nga naigo, 

ug nganong gakatawa ka. 

-- TEA SOLON
Cebu City, Philippines

kon unsa'y anaa sa pangalan: tubag ni inday sa panguyabulatik ni dodong

paminaw

labaw pa sa dugos ang gilatid niana

labi na kon linghod pa ang pangidaron 

ug putli pa ang pinitik sa dughan

nga lami ipasigarbo

samtang gipangaliyupo nga magmatngon 

aron dili matatsahan ug mapapas 

kining inampingan nga bansagon

paminaw

kay kon magpinutong lisod ang pagsubay

sa mga linya nga angay pun-on  sa akong pirma 

sama sa sss pag-ibig philheath ug uban pa 

paminaw

sa lanog nga gibilin sa katigulangan

ug ilang kaagi nga nagduso nag-abli 

nagtultol sa akong padulngan 

ug nag-ila sa akong kinatibuk-an

-- TEA SOLON

Cebu City, Philippines

kap-atan ug upat ka mga kabakaba: mamasapano, maguindanao

(alang sa mga hingpit nga nagpangga sa nasod) 

Dali, tan-awa
ang nakigbisog paggawas 

sa usa ka amarilyong lungon-uloran--
kap-atan ug upat ka mga kaba-kaba! 

Ipha. Ayaw’g langay-langay dinha!
Timan-i ug tutoki intawon ang matag usa 

nga giula sa kaisog hangtod 

sa kinalawman nga kalinaw.

Paminawa ang pagkabuak

sa yuta ug ang pagdaligdig

sa mga luha lapaw sa kaunoran.

Atubanga ug himamata sa unahan nunot 

sa pagtaliwan nila ang ilang sumusunod

nga kaliwat nga takos modumdum 

ug mohamok nimo kon malimot ka

sa imong paglingiw.

-- TEA SOLON

Cebu City, Philippines

hamok sa kataposang pasko

Anaa na sab ang kasinaw sa maraag-- 

mga bola sa Christmas tree. Ug bisan pa'g

gibitayan sa kinaham nimong kolor, kini

nanghamok, nangawras og balik

sa kagahapon diin naglingkod ka

sa tuwang-tuwang, naminaw og mga huni 

sa daygon samtang gisabak nimo 

ang mga bata, gatan-aw sa kipat-kipat
nga bangaw sa siris...

Sa gawas, bug-at ang taguktok 

sa uwan ug duyog sa kahagsaon 

ang sandayong, wala'y laing madungog
sulod sa hawan nga sala diin kanhi

gasugwak ang mga talidhay

nga gapasinaw og samot 

sa mga maraag uyon sa sa panumdoman 

nga galuhag sa kahaw-ang diha 

sa lingkoranan nga tuwang-tuwang.

-- TEA SOLON
Cebu City, Philippines

diha sa tangkal ni babe

Naa'y kinutoban ang lapok--

Sa pasipa sa kainit, mokubol.

Sa tanto’ng uwan, mohumok.

Inig dagayday, maghinayhinay 

og kahuyang, mokuyog sa baha.

Ug unya kon molagiting na, 

pastilan, labihan kakaging-- 

makatukod bisan pa'g palasyo

ug bisan lubot sa iniduro!

Pila pa kaha ka uwan-init

ang antoson sa lapok 

hangtod mogimok 

ang tawo?

-- TEA SOLON

Cebu City, Philippines

tutoki sa tago

gitamakan ang buwak 

nga gabay-ad dinha 

gawas sa tugkaran

walay pamilok

ang makabuta nga adlaw

gakapkap ang alingungot 

sa gadagmal nga tutok

pila ray asoy itom na

kilat dugdog kilat dugdog 

dinha sa gapasagad nga tamak 

sa walay katagbawang uwan 

nibukhad ang mga gihay

gitamakan ang buwak

nga nagbay-ad dinha 

gawas sa tugkaran

walay pamilok

ang makabuta nga adlaw

gakapkap ang alingungot 

sa gadagmal nga tutok

pila ray asoy itom na 

dinha sa gapasagad nga tamak 

sa walay katagbawang uwan 

nibukhad ang mga gihay

-- TEA SOLON

Cebu City, Philippines

pagbasa

kining pagbasa nimo kanako

buta sa mga kurba nga sinilsilan sa ka'yo
imong mga tudlo gasubay sa gabaga

ngabil
hawak
bat-ang
ug

dayon og dagan ang imong mga halok
hangtod sa pag-awas sa akong lawas
walay hunong padayon og subay

liog
abaga
pusod
ug

dinhi sa hinabolan nga lawak labihan
katin-aw ug dili kinahanglan ang mata
kining pagbasa nimo kanako

-- TEA SOLON

Cebu City, Philippines

pagtimbang

Aduna ba'y timbangan

ang gaan? Ug unsaon man

(kon buot hunahunaon) 

pagsalo sa dahon 

sa mansanitas kon kini

wala ra'y bili? 

Unsa ma'y sukod sa taming 

batok sa imong pagpuling

og kasubo aron dili mamuwa

ang akong mga mata?

-- TEA SOLON

Cebu City, Philippines

coron

Kaayo nimong mobulatik--

bisan makahadlok, mokurog ang kaunoran namo 

bahin sa balay-pating nga kalawom ug kaitom 

diha sa imong dughan.  Wa'y utlanan  

ang pagyawit namo hangtod nahidangat sa kaputi

sa bas. Ay, tinagoan nga kaanyag!

Usahay inig sudlay sa hangin tadlas  

sa imohang pagkaasul, mahingangha kami 

hangtod itugyan nalang namo ang kaugalingon 

diha sa imong pagkamadanihon...

Inubanan og pahiyom sa adlaw, nanggilak

ang nagkalain-lain nimong bulok

lakip ang gidak-on sa mga isda ug uban pa.

Gikan giangkla ang baruto, moandar pod dayon

ang agik-ik sa mga kauban nga ga-snorkel

pagtutok sa imong pagbihag 

nga dili gyod matugkad...

-- TEA SOLON

Cebu City, Philippines

paghagdaw gikan sa panumdoman

anaa ra si lola nena ay 

nagtakus og bugas sulod sa nigo

dayong lingkod sa tuwang-tuwang 

gisabak ang pili-anan og pasi

gitupad ang gamay'ng radyo 

lanog kaayo sa drama

samtang gipuknit niya tagsa-

tagsa ang pino nga bato 

ug mga itom-itom nga nahasagol

sa kiliran sa wala dayong hulbot

sa hinimong paspas pang-abog sa lamok

ug gipupo pod niya ang iba sa may hayhayan 

aron pusa-on ug ipahid sa batiis

ngano gud tawn wala ko kakita 

sa pagtulon-an sa adlaw-adlaw nga buhat ni lola

mangandam sa mga mopasakit

kon manglimbong ang puti nga abog 

hala tayhopa aron makita ang putli nga grano
puknita ang mga pasi, bato, ug bisan unsang itom

atangi ug paminawa pagsubli ang mga kulba

hinam nga sugilanon sa kinabuhi  

-- TEA SOLON

Cebu City, Philippines