visitation rights

Karuyag ko mingawon 

yana nga tapad ka 

ngan ubuson ini nga kamingaw 

sugad han pag-imod ta 

han ice cream nga imo gintugon 

paliton ko para hit’ at’ pagkita: 

“Hurot na, Pa,” siring pa nimo, 

samtang gintitimod mo gamit an imo tudlo 

an ultimo turo han ice cream. 

Kay bisan kun hirayo ka na 

o hirayo na ako, 

waray na salin 

nga kamingaw. 

Pero, diri ba an kamingaw 

dara han kawaray salin? 

Karuyag ko mingawon ha imo. Yana. 

Samtang kaupod ka. 

-- VOLTAIRE Q. OYZON 

Tacloban City, Philippines

ku_ _ _ _

an kulang hin sukol 

an kulang hin timbang 

an kulang hin nanam 

an may gibang 

an may gisi 

an waray bali 

an waray balor 

an waray bug-at 

an waray makalangpos 

an waray makatapos 

an waray násiplat 

an waray nápurot 

an waray nálingi 

an binibilngan 

an nawawad-an 

an diri ginti-text 

an diri ginri-reply-yan 

an mga diri kanugon 

an mga diri pagbabasulan 

an mga diri naulat ha panumduman 

-- VOLTAIRE Q. OYZON 

Tacloban City, Philippines

kadasig, diyes anyos

Kadasig an imo ngaran 

kay sinisiring nga an kinabuhi 

permi nga pakigbisog 

ha kalugaringon. 

Nakigbisog ka yana 

han dagom. 

Aanhon ba 

hin usa nga tatay 

nga tututdoan ka hin 

kaisog? 

Hini nga kinabuhi 

damo an pag-awayan 

nga aton aatubangon. 

Pipira hini pag-uungayan ta. 

Pero, may mga giyera 

nga aton la. 

Ikaw la; usa ka la 

nga maatubang. 

Aanhon ko ba 

Tutdoan ka 

hin kadig-on? 

Ano an angay mabaroan 

hin usa nga diyes anyos? 

Hadto 

han ginbuburod ka pa la nimo nanay— 

nahadlok ako hadto nga giyera. 

Siyahan ko adto 

nga pag-atubang 

hin sugad nga giyera. 

Pero, siring ko: 

Kun magmamatalaw ako; 

diri ako maatubang; 

Hin-o man an maato, 

magmamaisog para ha iyo? 

Siguro, yana 

diri kaisog an imo 

angay mabaroan 

kundi 

an humigugma. 

 -- VOLTAIRE Q. OYZON 

Tacloban City, Philippines

paglaba

Katima mo gìkan 

ginlulungtod ko an at' mga bunakan 

ha butnga han binitad nga taklap 

basi igbalotan, dad-on nga't ha sàlog 

upod an panay ngan pakang. 

San-o ko pahuroman, 

linain ko an di-kolor 

ngan busag. 

Tima, sabonon. 

Tima, kurokus-on; 

paglambahon han pakang 

an naawil nga mga baho. 

Tima latakan, 

bulyasan. 

Upod han mga buring ug bura, 

igin-anod han daganas han Himanglos 

an ak ha im' hinumdoman. 

Samtang pinanmamalaypay ko 

an magbusag-busag ko nga binunakan— 

nangalimwag an alimyon han imo 

panapton— 

may pag-iliw nga umalop ha akon dughan. 

Pastilan, kun nalalabhan la ini nga dughan 

akon gud ini paglalatakan. 

-- VOLTAIRE Q. OYZON 

Tacloban City, Philippines

ano kahilawig it' tulo ka segundo

"The shortest distance between two points is a straight line."

-- Euclid 

kun ini napapali 

ngadto hin tulo ka oras 

nga nabibitad 

ngadto hin tulo ka adlaw 

nga nababadbad 

ngadto hin tulo ka semana 

nga nababak-ad 

ngadto hin tulo ka bulan 

nga natuturosan 

ngadto hin tulo ka tuig 

nga nadadangaw 

ngadto hin tulo ka dekada 

ngan nadudupa 

ngadto hin tulo ka siglo 

ambot kun hain an 

haligot 

an                 tulo ka siglo

o,                  tulo ka segundo?

-- VOLTAIRE Q. OYZON
Tacloban City, Philippines

mga linya ha hunahuna hin usa nga bilin ha balay samtang tikasirom

Usa nga linya iton kabaraka kun natikang pamukrat an mga mata han langit ngan waray ka pa. 

An linya naunat ad infinitum sugad hin pag-unat hinin akon paghinunahuna kun hain ka na. 

An linya nakakaabot ngadto ha pag-ultan han kalarakan (kun mayda man). 

Pero diri akos hini nga mga linya batonon iton akon pakiana kun hain ka na. 

Kay an usa nga linya damo an pwede liko-likoan. 

Kay an linya ha hunahuna tadong nga liko-liko o, liko-liko nga tadong. 

 -- VOLTAIRE Q. OYZON
Tacloban City, Philippines

kan euclid pagsukol han kaburut-on

Diri an dupa 

o, an biksal 

o, an metros 

an maaram han sukol 

han hirayo o, hirani. 

Diri an kilohan 

o, an bahayan han duyan 

o, an timbangan 

an makakasukol 

han kabug-at o, kagaan. 

An kaburut-on la 

asya la an makakasukol 

han kun ano kahirayo an hirani 

ug kun ano kahirani an hirayo 

o, kun ano kabug-at an magaan 

ug kun ano kagaan an mabug-at. 

Ug an kaburut-on 

ambot kun masusukol. 

 -- VOLTAIRE Q. OYZON
Tacloban City, Philippines

pangisda

Kan Itay Selo, suhito ha kalalawdan han Pasipiko 

Nagraranggat 

han kadamo han dakop nga bituon 

an Makabugsay, an pukot nga nakatunod 

ha kahiladman han kahanaypan. 

Upod an pagdupa han lamrag han 

Mabugwas: Oras na basi libahon 

an tinunod ta nga Makabugsay.

Matungtong ako ha duha nga sugbong 

hinin sakayan, maguko nga bubutungon 

an aton igintunod nga langit: 

            Unom na kapanyo an aton natibaw: Hain 

            daw an mga bituon hinin lawod? 

Waray ka aringasa. 

Ha butnga han at’ kawaray saba, 

mingaw nga naghihiruhimangraw 

an sandangaw nga mga balud 

ngan han ligwat han imo bugsay 

nga danay sabatan hin naagi nga kanaway. 

Natungtong ako ha duha nga abaga 

hinin aton sakayan, 

naduko nga nagbubutong 

hinin mahawan, mamimgaw ta nga langit: 

waray man la nag-iinggat 

bisan butiti nga libat. 

 “Ayaw ta pagtinamuri,” sumiring ka, 

“inin waray ranggat, 

mabug-at, mamingaw nga langit 

nga aton liniliba.” 

 “Panhangad kita, didto 

diin nagbuburubukatkat hin kadamo 

hin tuloy nga mga bituon— 

an pukot han kalarakan 

nga nakatunod ha kahiladman 

hinin kahanaypan. 

 -- VOLTAIRE Q. OYZON 

Tacloban City, Leyte, Philippines