12.29.2011

damgo

sa bintana 
sa akong damgo 
masud-ong ang usa ka balay 
diin sa balkon makita 
ang gulang na 
nga ikaw ug ako 
diha sa kawayang lingkoranan 
nag-ibtanay sa atong mga uban 
samtang nagdagan-dagan 
ang atong mga apo
sa tugkaran 

(kang Mich)

--GRATIAN PAUL R. TIDOR
Dipolog City, Philippines

maayong buntag


sa pagsugot sa panganod 
nga paagion ang kiatan nga adlaw 
ang mga gaway niini 
sa bisan asang suok sa kalibotan
                                                                                                                                                                  nituktogaok ang mga manok
ug milugwa sa tubod 
ang tubig nga ikaligo 
katin-aw katugnaw 
sama sa samokan nga hagit 
nga usahay mokisaw 
gikan sa gilay-on sa langit
                                                                                                                      
maayong buntag 
matod pa sa gangisi nga silingan 
nga wala pa kapanghilam-os 
tabla ra mi kay wa pa pod ko 
kapanglimugmog

katam-is ba sa kahayag 
gikan kini gisakdapan 
sa kangitngit ug kalab-as ba 
sa mga tanom nga gikabay-an 
sa mga yamog nga mipalunhaw 
lakip sa akong kasingkasing
                                                                                                                                                                            ning sayong kabuntagon
higupon ko ang mga milagro 
nga wala nako hipalgi 
sa miaging gabii 


-- JONALYN ALMACIN-GOURDON
Nantes, France 

12.27.2011

sa wala pa hinganli ang bagyo


Daghan kanamo ang nagpangita sa lamat. Ang mga tiguwang 
sa among baryo gibiyaan ang hunsoy ug nisutoy sa ilang mga sulo. 
Gilibod ang kalasangan ug ang kapatagan, ubos sa kahayag 
sa takdol nga bulan. Ang mga bata nihunong sa ilang lupa-langit 
ug gitirador ang alisiwsiw nga puthaw nga naghadyong sa ibabaw. 
Ang mga batan-on nga gikan gisugo pagpangalos og tubig 
o ba kaha pagpamugha’g kahoy, nikatkat sa punoan sa akasya 
ug gitiholan ang matag lungag sa putol nga sanga.  Didto sa lantay,
gitugaw sa pakisusi ang nanagtapok nga mga dalagang nagkundatay
ug naghingut-anay. Diha’y usa ka langgam nga nagbitbit og
layang dahon, hinay nga nituyhakaw gikan sa salag. Ang kanding
nga gitugway sa lubi nihunong pod sa iyang pagsibsib, apan
nipadayon kini pagkataodtaod. Sa kangitngit, giduyogan
sa among kapitan ang kokak-kokak sa mga baki sa balilihan. 
Ang mga palahubog nga gikang nagmaoy, nipugos 
sa pagkahuwas aron moduyog sa kaguliyang. Mao kadto 
ang panahon nga luwas ka sa imong pagkahisalaag 
ug ang hingpit nga paghigugma wala pa ma-impiyerno.


-- ERIK E. TUBAN
Sibulan, Negros Oriental, Philippines

tingog nga gaunos sa sulod


Di na ko makadungog sa mga tingog
sa akong mga higala dinhi sa Burgos.

Di na ko makadungog ni Dodong
nga kanunay gaaghat kanako’g laag.
Wala na’ng hagawhaw nilang Toto ug Imok
nga makatakod kanako’g agak-ak.
Wa nang mga higayon nga magtigi mi’g
patag-asay og ihi (Kon itandi sa sulog
sa suba, dagayday ra among agas).

Di na ko makadungog sa mga tingog
nilang Yani ug Ai-ai nga nagtamudmod
nga di sila makakuyog dungan namo.
Sagad gabagutbot mi kay mora mi’g
gitanggong sa balay kon moulan.
Ug bisan tuod nga mora mi'g iro'g iring
sa paglalis, mosubang pod ang adlaw
nga kami makasinabtanay taman sa pagtuliyok
sa among utok, mora’g nalabyan og bagyo.

Apan sukad milabay si Sendong, wala na’y
laing madunggan gawas sa mga danguyngoy
sa ilang ginikanan, ang mga uwang
sa mga sakyanan, ug nangabilin nga tingog
sa akong mga higala nga galanog duyog

sa sulog. Hangtod karon, padayon ang haguros
sa akong kasubo. Wa’y kataposan ang unos.


-- TON DAPOSALA
Cagayan de Oro City, Philippines

12.25.2011

sa akong pagbiya wala ko motalikod


1974. San Francisco International Airport. 
Nganong ang panyolitong giwarawara ko 
ania man ning giagup-opang maleta ning gilawalawaang bodega? 
Ang kotseng naghatod nisugat ganiha unya gipapahulay 
sa tayaong garahe. 
Sa kanhi kong lawak ang mga pustisong tekla 
sa ubanong makinilya mahimamatong nanggitik sa mga tudlo ko. 
Ug ang nahabilin nahipasadpasad nga mga batan-ong balak 
kaniadto mahinangpong nanglukso, naghugyaw, 
namalik daw mga latagawang password sa akong pagduaw puhon: 
Enero 2012. Mactan International Airport.


-- MELQUIADITO M. ALLEGO
Palm Harbor, Florida, USA

nganong lawom ang lubot sa kaldero


Gahagpat ko tagsa-tagsa sa mga nanglabay 
nga mga adlaw, labi na niadtong katuigan nga dayag 
diha sa mga kunot sa agtang sa akong lola 
nga wala gyod magdahom karon sa bag-o namo 
nga pinuy-anan dinhi sa langyaw nga dapit 
diin madanihon bisan ubos sa dag-om  
diha sa langit nga daw napasmo sa adlaw.                                                                                                 
Tataw nako karon sayo sa buntag ang mga liti 
sa dalan. Usahay mapatik dinhi, tadlas sa gatuaw 
nga katugnaw sa hangin, ang mga tunob 
nga sama sa lapok inig labay atong puti 
nga tigulang. Hain na kaha nasaag iyang kalipay?
Giduaw tingali iyang mga apo.                                                                                                              
Sa una, labi na’g tingduaw sa unos, walay gahom 
ang dag-om samtang giandam sa akong lola 
ang dagko nga kawa ug kaldero. Nagluto siya’g biko 
aron iparis sa siyakoy nga sama sa akong tudlo 
ang gidak-on. Ug aron dili madunlan akong paglad-ok, 
naa sab ang dinukdok nga luy-a gapanaghoy 
sa gamayng takuri. Kinsa’y gadukdok sa lubot 
sa kaldero, ug nganong napiyahok kini? 
Nasiplatan nako ang tubag sa kandiis, diha sa wala 
nga bahin sa gakunot nga aping ni lola, nga nagpalawom 
sa iyang pahiyom ug nagdan-ag sa iyang panagway.                                                                             
Sa gamay pa ko, tinudloan ko unsaon pagtambol 
sa luwag og kaha aron pukawon ang mga nahikatulog 
samtang garisiko akong lola sa kinaham namong biko. 


-- DENNIS S. SARMIENTO 
Maryland, USA

12.23.2011

apologia pro poemate meo

dili kay dili
na ako
mao
kon
dili dili
na mao ang
yuta dili
na mao
ang langit
dili
na
mao
ang
kagahapon


-- VICENTE VIVENCIO BANDILLO
Manila, Philippines 

umaagi


Niadtong akong pagbiya 
ning atong lungsod, wa ka pa
matawo.  Karon, 
tigulang na ako ning akong
pagbalik.  Labi na kadako
ang mga akasya apan sama lang
gihapon ang mga kabalayan.
Kanang daang balkon
nga karon imong gilingkoran
kaniadto kadaghan ako misaka
ug milingkod sa iyang barandilya.
Mitutok ka, apan bisag unsaon
wa ka makaila kanako. Kay karon
usa lang ako ka umaagi ning
samang dalan nga may nagbilin
og samang mga libaong.


-- URIAS A. ALMAGRO
New Berlin, Wisconsin, USA

12.20.2011

sa kaadlawon




Dihang ila kong makit-an sa balabag 
Sa akong kamatayon ang langit sa palibot 
Mopula nga layo kaayo duna unya’y katahap 
Sa dagat ug, gikan sa ibabaw, 
Karon sa makahadlok nga kangitngit 
Usa ka puting langgam ang mosaysay sa akong mga awit. 


-- MICHAEL U. OBENIETA
Topeka, Kansas, USA

ganghaan


Nakita nimo ang pagtugpa 
sa dahon nga gidala sa hangin gikan sa gawas ngadto
sa imong lamesa diin nahimutang ang imong libro
samtang anaa ka sa tungatunga
sa imong pagpamalandong.

Dahon lang god sa mangga, mao lang kana--
walay mabasa nga sugilanon
sa iyang kaugalingon ug walay naa niya
nga makahingangha nimo.

Yano lang nga dahon
nahisama sa usa ka adlawan nga walay
manok nga giihaw, wala’y kalainan niadtong
lubong sa batang namatay sa sakit sa tiyan
nga gihimoan og lungon nga gikan sa kahoy
nga mangga sa iyang tatay, ug unya milabay sa tungod
sa inyong balay ang mubo nga panon sa nagsubo
wala ang tukar sa kamatayon ug wala po’y buwak
nga halad nga gidala sa mga mibilar.

Yano nga dahon lang
nga buot nimong puniton, dayon ilabay unta
sa gawas sa bintana aron mahulog kini
sa yuta, apan nakahangad ka sa langit nga mao ra’g
nagsuta kon naa pa ba ang adlaw.

Nabati mo ang dakong bagyo nga nag-alburoto
sulod sa imong dughan samtang nagtagbo ang duha
ka kamot sa orasan, dayon nabati mo ang hangin
nga mao ra’g gapahibalo og pagpangandam,
ug sayod ka kon unsa kini.

Bisa'g hapit trangkahan sa dag-om, naaninaw nimo:
Adunay ganghaan ang langit.


-- RIC S. BASTASA
Katipunan, Zamboanga del Norte, Philippines

12.18.2011

tugnaw


Misangyad na sa yuta
ang mga sanga
sa bombel ni Nanang.
Mihinay-hinay na’g kamang
ang mga balili padu’ng sa nagliyok-
liyok nga sementadong hagdan lahos
sa among wanang.
Tingali mao na la'y
mopuli sa dayak-dayak
sa mga gagmayng tiil kanhi
kauban sa mga pinutos
nga mga karmelitos.

Milili na ang mga sanga 
sa acacia sa bintana ni Tatang--
tingali natingala kon hain na
ang mga agik-ik sa mga magpasabak
nganagkamuritsing sa latik sa biko
ug putong pinalutaw ni Nanang.

Puno pa ang bayanan 
sa pilit-humay ni Nanang
apan bugnaw ang among
abuhan samtang nagduka na
si Tatang sa may bintana,
gapaminaw sa mga amba
ug hudyaka sa gawas.

Ug unya duyugan dayon 
nilang Tatang ug Nanang
ang mga kinana-as sa nagsingabot
nga katugnaw sa Pasko.


-- GINA MANTUA-PANES
Cebu City, Philippines

buhok ni inday nita


Ang binugkos nga buhok
ni Inday Nita, nga bag-o
lang gishampohan og
lana sa lubi gikan
sa iyang uma, gisunod-
sunod sa mga langaw,
abi siguro nila ni'g
pamahaw. Maayo unta 

ang mga lusa og kuto
iuban nila og hagdaw.



--JONALYN ALMACIN-GOURDON
Nantes, France 

12.16.2011

karon


Karon miabot ang ugma
Nga gipas-an sa nagkaguliyang nga kagahapon
Nga naglatid sa kahimtang sa karon.

Ug kon di usbon ang karon
Gidawat na ang malisod nga kagahapon.
Piho na ang moabot nga ugma.


-- JON R. SAGUBAN
Iligan, Philippines

langyaw sa disyembre

Gikan ko sa Wendy’s
gapalit og caesar’s salad.

Gihapnig daw dalandalan
ang mga kwadradong hiwa
sa ilahang adobong manok.
Ug tam-is pa sa kalibotan
ang kamatis nga gatuyok
sa akong palad.

Sama sa linog akong pagpauli
kay gasugod og ambak
akong mga tudlo aron
tagbawon ang akong kagutom
sa mga lunhawng letsugas.

Paghiabot sa among driveway,
gaalisngaw sama sa tugnaw
ang akong kaibog didto sa bildong
bintana kay ang takdol sa buwan
daw anino nga gahubad
sa hulagway nga galantaw
sa puting hangin.

Sama dapit sa akong pinuy-anan
kanhi aduna’y mga nanaygon
sa kangitngit nga karon nangahanaw
daw mga kabhang sa mani
nga akong gisabwag sayo sa buntag.

Kon kinaham sa squirrel ang magpundok
og mga mani inig tingtugnaw mao sab kadtong
bata sa bintana, nangandoy sa mananaygon.

Sa akong bahin, dili sab nako ikadalit
ang akong caesar’s salad ngadto sa bata
kay gapangita na siya og chicken nuggets.


--DENNIS S. SARMIENTO
Maryland, USA

12.14.2011

lake chargoggagoggmanchauggagoggchaubunagungamaugg


Kinataliwad-an sa saksak-sinagol karambola sa gaambihas
nga mga dekada karong gabhiona kami kuyog ang kalag
ni Stanley Kunitz magbisikleta padulong pabalik sa taw-an
nga linaw sa kasaysayan mamingwit mamana
makiglumba og langoysawom sa mga pulang lumad.
Ang ilang mga udyongapasan managdoy sa among trumpeta
nga suliyaw ubos sa gibitayng taytayan nga naglukdo’g tambol
himalatyong bulan sa nagkabayo kanhiay nga panahon...


--MELQUIADITO M. ALLEGO
Palm Harbor, Florida, USA

kalabot sa kahilom: inubana'g pagtamod kang Tomas Transtromer


kon maoy kataposang lami atol sa noche buena
andam kong moinom sa nagdagayday nga tubig
sa itom nga kanal sa intramuros pero klarohon
nako ang pagtago inigyarok ambihas sa
tuhirig nga taknaang tore sa manila city hall
bahalag nganlan kog hakog sa mga rugby boys
ug esnatser sa underpass mga kanahan sori na lang
kay mao ni akong paagi pagsaulog sa pasko
unya magpakaaron-ingon kong tanlas ug sakto ra
sa templa ang hiniusang aroma sa kabaho
kaangtod ug kapait sa biya sa mga yamhangan
ug kon sakto na sa karga, ug sakto na kaayong tamaa
lantawon nako ang hilomong mga alahas prendahanan
ug magyawyaw kog hinubog kalabot sa gugma ni maria
pasensiya kay hubog ang bisita sa pasongan sa baka


--OMAR KHALID
Metro Manila, Philippines

12.12.2011

videoke: pasakalye nganong lisod ug dili maayo kantahon ang “somewhere over the rainbow”


didto sa dakbayan nga gagilaw ang kalunhaw
didto sa tumoy sa gadalag nga dalan
didto ang salamangkero

nasakpan kay tingali iyang kaigmat
layo ra sa gimino namong kanta nga nangahas
pagkilaw lupig pa’y sumsoman sa katugnaw dinhi
sa Kansas diin sagad manuktok dayon
ang pulis sigon sa sumbong sa among ugis
nga silingan kay basin natugaw siya
sa iyang pagtuo nga lupig pa namo
ang tikasan nga mananaygon nga gapalanog
sa iyang kasadya ning taknaa bisan
napasmo ang bitok sa iyang tiyan ug

dinhi na lang mi kutob sa kabanha nga
dinhi buloyagon lakip ang talidhay nga labaw pa
dinhi sa tyabaw sa namatyan


--MICHAEL U. OBENIETA
Topeka, Kansas, USA

sa paglantaw

Mahimuot ko magtan-aw
sa mga kahoy luyo sa lawak,
labi na gyod ‘tong duha
nga pidpid sa may paril.
Gikan diri sa bintana,
ang usa mora’g hubog
nga nangihi sa bungbong;
ang usa mora’g higante
nga otinan apan wa’y itlog
ug sa iyang isig ka paa
gakabayo ang duha ka
hubo nga babaye
nga puros walay ulo.


-- GRATIAN PAUL R. TIDOR
Dipolog City, Philippines

12.10.2011

pagbiya paghikalimot

gubaon ang taytayan
sa dakong suba

mihunong ka
abi kog moambak ka
aron molangoy sa pikas tampi
nagpaabot ko

mibalik ka sa imong agi
nangita ka nako

suginlan ko unta ikaw
nga ako miambak
milangoy sa pikas tampi
hapit mamatay

apan wala nay pulos
ang kabahin niini

lahi na ang atong kalibotan
taas pa ang dalan
nga akong lakton
ug gikalimtan na sab nako

ang tanan
bahin kanato



-- RIC S. BASTASA
Katipunan, Zamboanga del Norte, Philippines

luib


nagkurog nagluspad ang imong wait 
nanimahong sibuyas bombay 
ang imong gininhawa natigaman pod 
ang imong halok gitagamtam 
sa maluibon nga mga ngabil 
gisawsawan sa atong silingan


--TEA SOLON 
Cebu City, Philippines

12.07.2011

pagpungko: hubad sa balak ni Robert Morgan


Ang mga tawo sa banikanhong mga dapit kon
sila mohapit aron makigkabildo ug mamisita
di magtindog, kay kana daw sabton
nga sila nagdali. Ni di sila molingkod
sa yuta nga tingali baya’g ngamig o basa.
Imbis mopungko sila sa kahamili
sa mga tikod nga duol sa yuta ug makighinabi
sa daghang mga oras. Ug samtang sila mosaysay
ug motubag, o maminaw, nagyuko sa hangin
ilang guhiton sa mga tukog didto sa yuta ang mapa
nga mobatbat og usa ka sugilanon o
mopadayag og ibidinsya sa usa ka lantugi.
Mokuriskuris sila og mga sulundan, mosulat sa yuta
ug mobirisbiris sa di klaro’ng aritmitika,
kadtong di gyud gani makakupot og dagang
ngadto sa pahina, sa bato’ng pisara o luna.
Sa latagaw’ng hunahuna mohimo sila og mga porma
ug mga pigura sa ilang mga dulodamgo
nga panason lang usab nga hingpit
aron di kahatagan ang ilang arte og status
sa katahoran sa daklit nga salibay
sa pakigpulong, sa dayag nga katigoman
sa kumonidad, didto sa gawas niadtong dayag
sinati nga natad diin ang daghang mga kaliwatan
mipungko, mitawag niini og pagpanag-iya.


Gihubad ni:
--URIAS A. ALMAGRO
New Berlin, Wisconsin, USA

lamaw


Ilawom nianang lamisa nga narra nagyampungad ang iro, gapunay'g huwat sa mumho nga motugpa sa iyang atubangan. Nakiglalis na gani siya sa iring; iya nang gihagawhaw ang iyang kagutom, ug sa wa madugay, mibarog ang tagtungod nga gibutdan sa tiyan, tungod sa tambok sa baboy'ng gitulon ug gisuka sa dakong babher. Naglutaw ang nagkadaiyang kolor sa sud-an nga nahabwa kini gikan sa iyang gikulata nga ginhawaan hangtod ang sinuka nahimong lamaw, naglatik sama sa naugmaan nga lugaw. Ang hangol nga iro, daling mibarog ug misimhot sa babher, gipanid-an matag kilid, ug kay wala'y nadunggang kasikas, wa magduha-duha pagsakmal sa lamaw, iyang tiyan natagbaw sa lamaw, iyang dila nakatilaw sa lamaw, iyang kagutom nahanaw apan taud-taod mitubod ang ang dili kapugngang kabidli. Gibati niya nga kahabwaon ang kalit nanghugot niyang tutonlan kay, hala, naungot diay ang pustiso sa tagtungod sa sinuka. 


-- JONALYN ALMACIN-GOURDON
Nantes, France

12.05.2011

si de chirico angay pantonon

de chirico
kumpare ko
ang utok mo
way panapo

kumpare ko
pilosopo
way panapo
girapido

pilosopo
simpatiko
girapido
ang simbolo

simpatiko
ngadto-ngadto
ang simbolo
binarato

ngadto-ngadto
ang utok mo
nasinsiyo
de chirico


-- VICENTE VIVENCIO BANDILLO
Manila, Philippines

mora mora lang

Ang uyab mora og tinola;
Lami kon init pa.

Ang kabit mora og inun-onan;
Lami gihapon bisan maugmaan.

Kinsa'y mora'g sardinas, ablihan
Kon wala na'y laing sud-an?


-- NICANOR LOPEZ
Kissimmee, Florida, USA

12.03.2011

holidiaspora: pagtuaw taliwala sa katugnaw sa disyembre


Nadum-ok sa bisan asang suok sa kalibotan. Gakapakapa
ang pak-an nga kahangol gikan sa mga buak nga baybayon

sa atong kapupod-an. Paminawa ang kaparat sa huyohoy,
lupig pa’y gibugwak sa nalumos nga tig-asoy. Nalubong,

ug naukal ang lingagngag sa gihubak nga mananaygon.
Gisaw-an sa irong-buang nga katugnaw ang nangalimyon

nga minantikaang buwad-lawlaw, misiot bisan sa ilok
sa inahang byuda nga gadupa-dupa, gahalhal ug galaway

samtang natulilik ang parol sa paghaguros sa kabog.
Ning taknaa, gapanilap gikan sa layo ang mga tingtakdol

nga tingog: Pauli na intawon, minahal nga manananggal!


-- MICHAEL U. OBENIETA
Topeka, Kansas, USA

pagsabot


Dili sawayon ang giisip nga sayop nga nasulti;
Hinuon pamalandongan. Balik-balikon pagsulti
Sa hinay.
Diha sa kahilom sa kaugalingon--
Hunahunaon,
Utingkayon,
Bali-balihon.
Nganong iyang nasulti?
Unsay hinungdan?
Unsay kahimtang niya nga nakabungat?
Sabton ang maayo. Hagpatan: lainon
ang salikwaot ug laksot.

Kon di gyod mahimo, way matiti, sabton na lang.
Labaw ka nga nakakita sa wa niya makita.


-- JON R. SAGUBAN
Iligan City, Philippines

12.01.2011

ayroplasahero


kon pananglit may magtinunto nga hijacker ang piloto hubog
o nakatulog kasakay nga naghuramentado langgam nga
nahisalaag midasmag sa makina o mikapyot sa palabad
impas kitang tanan gawas tingali nako kay diyosnon puyra
buyag magrosaryo kada oras mosimba matag adlaw idulog
man gani ang imahen ni Santo Niño apan kon signos man gayod
ug maoy palad naangkon probitsahan ko na lang nga makiglamano
ni San Pedro ug mangumosta ni Joe Tomarong* mintras tanto
respetahan ko ang roasted peanuts ug Sprite nga gidudho
sa stewardess unya human makapasiplat sa utlanan sa

nagbuntaog nga dughan sa katupad mag-catnap na lang ko

___________________________________________
* Joe Tomarong: usa ka Bisdak nga magbabalak nga bag-o lang
namatay gikan nabanggaan ang gisakyan nga traysikol.


--MELQUIADITO M. ALLEGO
Palm Harbor, Florida, USA

sukad sa sayaw


Day, kahinumdom pa ba ka
sa mga gabii sa diskoral?

Naglumpayat og dakop-dakop
ang gaalirong nga diskolayt,
nagsadsad sa abog gikan
sa gakundat nga mga tiil.

Day, kahinumdom pa ba ka
sa mga gabii sa diskoral?

Duha mong nahidangat didto
sa kalubihan apan nganong
nag-inusara ka ron pagsugod
og ihap sa imong ikasiyam?


--JESSREL E. GILBUENA
Bantayan, Cebu, Philippines

11.29.2011

kalit

Hait ang sagpa sa hangin
dihang iyang nabalitaan
nga wala na

iyang inahan.

Kalit iyang pagkabungol
sa gikusgon sa sagpa,
sa hungihong sa kahapdos
nga karon pa niya sukad
nahinagbo, sa syagit
nga galanog sulod
sa iyang dughan. Bug-at
ang dag-om
sa iyang hunahuna,
di matimbang sa bisan
unsang pulong
ug malitok lamang
sa hilom nga paglanaw

sa iyang luha,

nga wala niya damha
labaw pa sa kalit
nga paghagsa sa langit.


--GRATIAN PAUL R. TIDOR
Dipolog City, Philippines

sista


gaan kaayo imong mga tudlo hanas mogitik 
sa akong hawak liog kasingkasing 

nitukar dayon ang akong katawa agulo ginhawa 
imong kinaham nga kanta 


--TEA SOLON 
Cebu City, Philippines

11.27.2011

ang mga repolyo


Kon makakita ko og mga repolyo
nga nanagtubo, akong mahinumdoman
ang akong mga adlaw sa high school,
ang subject nga gardening diin
gihatagan kami og tagsatagsa ka
gamay’ng luna sa yuta nga
among gitamnan og mga talong,
kamatis, sibuyas ug mga repolyo.
Human sa mga pagpadpad, mga pagbubo
ang mga repolyo nanubo ug miporma
og lunhaw’ng mga ulo. Ingon usab
ang mga lunhaw ug nanagtubo namong
mga utok niadtong panahona.
Unya mihugpa ang mga ulod.
Miataki ug dali’ng mi-ut-ot sa mga repolyo.
Ug daghan niadtong mga lunhaw’ng ulo,
mga lunhaw’ng utok, ang nangaangin.
Wa makapadayon sa pagpanubo.


-- URIAS A. ALMAGRO
New Berlin, Wisconsin, USA

panahon sa pagkauga sa akong mga luha


tugkaron ko ang tadyaw nianang imong gibati 
suginlan ko imong damgo sa akong mga pangadye 
pag-abot sa panahon kawsan mo akong dughan 
ug pun-on sa pagbati pag-abot sa panahon 
damgohon ug dunggon mo akong mga pangadye 


-- JONALYN ALMACIN-GOURDON
Nantes, France

11.25.2011

ang bugtong gasa

ang gisakmit
gikan kanimo

sa panahon
sa imong kabatan-on

dili mo mabawi
gikan kanako

nga karon
ang gipanag-iya

mao na lamang
ang walay kinutoban

walay kinutoban
nga kahaw-ang


-- VICENTE VIVENCIO BANDILLO
Manila, Philippines

ang payag sa bungtod

inig-abli sa iyang bentana
mosulod ang kabuntagon
sa sulod, mangukab sa
tinabonang tinughong sa
babher, manimhot sa sinugbang
putpot, molingkod sa lantay
magkanta-kanta og
kamingaw sa payag,
ug kon mokatol ang kamot
mangawat og itlog sa pangki,
manghimudlay sa
sibay ug magpakaaron-ingnon nga
karaang bisita, magtaghoy-taghoy,
motilaw sa utan-kamunggay,
unya mogawas kini nga
magsipit sa kahumot sa aso
sa abohan, lugsong sa darohan
mosakay sa kabaw ug mohunghong
sa mag-uuma nga tingpamahaw na
ug nakaligo na ang iyang asawa



-- OMAR KHALID
Medellin, Cebu, Philippines

11.23.2011

lapida: maguindanao, 11-23-2009


Tahali pag-ayo ang lapis hangtod labaw pa kini katalinis sa bala. Ayaw
pamilok sa pagtusak-tusak sa mga buslot nga tuldok sa kalimot. Ayaw

pik-a ang papel, gatabon sa mga lawas gikan giugkat sa yuta. Ay, dili
unta mauga ang dugo ug luha batok sa makabungol nga luom. Dili

unta magtingkagol ug madugta imong tingog ilawom sa kangitngit.
Ayaw pakiglahi sa mga minatay kon ang imong pagtutok dili hait.



-- MICHAEL U. OBENIETA
Topeka, Kansas, USA

tanghaga sa atong mga kamatuoran

i

ang mga kamatuoran
nahisama sa gamayng kamot
sa bata
mibukhad sa napulo ka
mga tudlo

ii

hinumdumi ang paypay
nga naghimo og hangin
ipha kon pila ka pilo inig
ablihan nimo ug pila kon
imong sirad-an

iii

walay paypay nga tupong
ang mga pinilo
sama sa mga tudlo
sa atong mga kamot

iv

sa kataposan ikaw
hiposon ko pagbalik
walay pilo
kumkomon sa palad
nga tago


-- RIC S. BASTASA
Katipunan, Zamboanga del Norte, Philippines

11.20.2011

kang inday nga biniyaan

Tugoti siya nga motukod
Ug taytayan pabalik sa
Gakang-a mong dughan.

Pasagding pandayon niya
Pag-usab ang lawak
Nga gianay--kaniadto
Inyong gidayan-dayanan
Sa mga giuran-uran nga
Ginunitay ug kinuhitay.

Pasagdi kon kini
Tinapakan na lang.

Moabot ra ang panahon
Ang mga tinapakan kaniadto
Mopapas sa mga karaan
Ug gasiwil nga mga pangagho.



-- GINA MANTUA-PANES
Cebu City, Philippines

alang kang sisyphus

Sama sa buwan ang akong pagduaw
gabantang sa pikas nga bahin sa imong bukid.
Buot unta nakong sutaon ang imong gibati
sa pagligid anang dakong bato. Ay, kinabuhi!

Sukad sa imong pagkapukan, ang panan-aw
gapunay la’g tutok sa tungasonon ug lugsongonon.
Gabalik-balik sa akong handuraw ang imong kaagi
sama sa adlaw nga mopatighulog ngadto sa gabii.

Kanus-a kaha mohunong ang pagtuyok
taliwala sa akong pagpaabot sa habog nga dan-ag
nga mokisaw sa dagat inig banag-banag?

Kadugay na sa kapakyas pagtabok sa bukid.
Ug karon ania ko-- dili na ko nimo malantawan
nga gahangad sa kahayag sa pikas nga buwan.



-- DENNIS S. SARMIENTO
Maryland, USA

11.18.2011

mga baka sa dagat: mga manatee sa homosassa


nanibsib sa mga latagaw nga lumot ang kamay-ong
sa mga kataw nga gitugway sa kinoralang lagunahunasan
sa mga gaang sa hardin nga namungingi sa mga tagimtim

sila nagtakobang mga malumong higante sa piliw
sa mga budyong kon igang ang gabii anaa sila
magtampisaw sa mga lim-aw sa bukanang tagboanan
sa naglambigit nga dagat ug suba

patalinghogi ang nagtinikbong nilang pagtimbaya
pamatia ang ilang pag-ingaaaa una ihikot sa pisi
sa toril sa usyosong dumuduong


-- MELQUIADITO M. ALLEGO
Palm Harbor, Florida, USA

birig

namuwa ang aping niining mauwawon nga papel 
kalit lang nahapyoran sa gahalok nga mga pulong 

gikan sa akong dughan 

--TEA SOLON 
Cebu City, Philippines

11.16.2011

nganong nindot manglaba kon heartbroken


Sa pag-inusara ikatugbang ang balde ug planggana,
andam mosapnay sa nagtipun-og nga labhonon.
May kaigmat taliwala sa kaputi ug mga bulok sa panapton,
sa pagpahan-ay sa mga pino'ng piraso layo sa dagko,
sa inampingang nuog lahi sa pantalon.

Bisan ang lilo sa washing machine dili makaasdang
sa kumpas sa kamot dayong humol sa tubig. Di na mistil
mamagnos og chlorine; ang gikusgon sa matag kuso-kuso
dali mopalanay sa gahing mantsa nabulit sa puwang sanina.

Ang pinitik sa pulso sa gikumkomang kahilom
mopatin-aw sa matag banlaw ug puga sa sinabonan.
Dayon iladlad ang bestida gamit ang Perla—ang pinisik
sa sabon molabtik sa mata—halang man apan wala
damha nga dali mopaburot ug manganak og bula.


-- GENALYN G. OMAPAS
Cebu City, Philippines

pagkaopaw

Gihimulbolan na sa panahon
Ang kanhi korona sa kaambong;
Ang kagara sa kalabong
Nagpabilin na lang monumento
Sa hulagwayng gikuwadro
Nga karon gibad-ay sa
gilawalawaang pagapaga.


-- JON R. SAGUBAN
Iligan City, Philippines

11.14.2011

tugoti

kay nakahukom
ka man
nga magpabilin

tugoti
nga biyaan
ko ikaw

aron andam ako
nga mosugat
kanimo

sa dapit diin kita
iyahay
nga naghulat

kaniadto
sa wala pa kita
magkahimamat


-- VICENTE VIVENCIO BANDILLO
Manila, Philippines

linog


Ang kasakit sama sa linog. Lisod ikatagbo kon asa ni magsugod.
Bisan imong tultulon ang iyang sinugdanan, lisod mangita og
pamaagi kon kanus-a gyod ni moduaw og balik. Ang linog dili
maam-aman og mga luha. Ang kasakit sama sa linog. Karon,
24 na ko, apan ang linog dili gihapon matipigan sa mga gutling
ug gutlo, dili matag-an kon unsa ang takdong oras sa iyang
paglanog ug pag-uyog kanako. Dili ko kahisgot nga moabot kini
alas kuwatro ba kaha sa hapon, Martes, sa dalan P. del Rosario.
Ang kasakit usa ka linog. Dili nimo malantawan kon unsa ba
kadako ang iyang pagtabyog sa yuta, dili nimo maihap dayon
pila ka balay ang mga mangaguba, pila ang mga mangamatay,
ug kon maugkat ba kaha ang mga lawas. Tuod man, dili dayon
maihap pila ka kasingkasing ang mga nibarag. Ug usa nako ato.


-- CINDY VELASQUEZ
Cebu City, Philippines

11.12.2011

pancit

Dugay nang gisirhan
kadtong gamay’ng tindahan
diin adto ako mopalit
og bulad nga nukos ug pasayan.
Ug ang akong suki sa taboan
nga palitanan ko og sibuyas,
repolyo ug ahos
dugay na usab nga mibiya.
Ang miki didto ko palita
sa dakong tindahan sa Intsik.
Ang asohong dapog, ang sug-ang
dugay nang nangahanaw
ug ang daang kalaha
wa ko hisayri kon diin mahipunta.
Apan karon human sa mga katuigan
daw ako pang hitilawan kadtong
pancit nga kanhi maoy akong lutoon
ug ipanihapon sa hilom
nga mga gabii sa akong kabatan-on.


-- URIAS A. ALMAGRO
New Berlin, Wisconsin, USA

buot


bisan pa nag-atubangay tang duha
buot kong moatubang pa gyod nimo
buot tutokan pag-ayo imong pahiyom
buot gakson ang matag takna
ug kon mahimo pa lang
tukohan ang gaway sa orasan

apan wala na koy mahimo kon
buot nimong molingiw
ug sa imong paglakang palayo
buot ko na lamang pamuniton
imong nagkahanaw nga mga tunob


--JESSREL E. GILBUENA
Bantayan, Cebu, Philippines

11.10.2011

alindanaw

Iyang kapakapa dili maihap
sa akong pamilok. Gakanaas

iyang pako sa pagbatog
sa akong tudlo, ug dayon

mibalik paglupad. Kanus-a
motugpa sa akong bukton

ang buot nako angkonon?
Taliwa sa damgo nga wala’y

utlanan, mapukaw unta ko
sa pagbalik sa alindanaw.


-- DENNIS S. SARMIENTO
Maryland, USA

gabii sa pagpanu’


Gihapuhap sa huyohoy ang akong tangkugo. Gisud-ong nako
Ang mga gisaw nga gigukod sa mga nanubad nga bawo.
Nibuliskad ang alimyon sa parat nga hangin sa akong ilong.
Nikisaw sa akong dunggan ang tugnaw nga hunghong.

Gitamparos kalit akong kahimatngon, mora’g gihilam-osan
Sa dihang miambak ang kasag gikan sa iyang gilubloban.
Gihugtan ko paggunit ang dala kong petromak ug sundang--
Ay, sa unahan akong kuyog diay nadalin-as, natikangkang!

Lamia kilawon sa isda og pasayan nga sa pagpanu’ makuha,
Bitaw, lagmit makapanilap pod ka kay labaw pa sa humba.
Ang mga laway magtubod, magtilagak. Mga luha magbanaw
Sa kahalang sa suka. Makatagbaw tuod: kalipay nga mabaw!


-- GENE LARIOSA
San Fernando, Cebu, Philippines

11.08.2011

kilumkilom

Mibatog na ang himungaan
sa sanga sa kahoy nga gasayaw-sayaw
duyog sa hinanapos nga tuktugaok
sa talisayon.

Ang nalukot nga aso gikan
sa gidauban nga mga dahong laya
hinay-hinay nga nahanaw paingon
sa poste sa kuryente diin nanukad
ang panon sa mga langgam
nga misugat karon sa ulahi
nga kahayag sa adlaw.


-- GRATIAN PAUL R. TIDOR
Dipolog City, Philippines

Daghang salamat sa mga maniniyot nga gapaambit sa ilang mga hulagway sa Google ug Flickr.