mga hulmigas

1.

Sama sa hulmigas

duna akoy kaugalingong

lugas nga gitulod

sa tibuok kong kinabuhi.

Hiposon

sa gamay kong pinuy-anan.

Ang usa ka lugas

tugbang sa usa ka adlaw

sa ting-ulan.

2.

Mga hulmigas 

nga naglataylatay 

sa usa ka batang. Balikbalik 

gikan sa usang tumoy 

ngadto sa pikas tumoy,

samtang ang batang naglutaw

sa sapa.  Ingon usab kita

nga nia ning naglutaw’ng batang 

nga gianod sa sapa 

sa kapalaran.

-- URIAS A. ALMAGRO

New Berlin, Wisconsin, USA

higot

Ang gugma ingon lang

sa higot sa liog

sa usa ka mananap.

Bisag unsa kataas ang lugway,

ang mananap magpadayon

sa iyang paglugnot.

Kon ang higot tago,

dali ra ang pagkabugto.

-- URIAS A. ALMAGRO

New Berlin, Wisconsin, USA

pagkatimbang

Ang kasing nga karag

dili mahimong molundok

bisa'g unsaon pagbungso

o pagsaklit.

Ang tabanog nga way ikog

dili tanos ang paglupad

ug magtuyoktuyok lang

sa kahanginan.

Ang kinabuhi

nga way pagkatimbang-- 

usa lang ka kasing nga karag,

usa ka tabanog nga way ikog.

-- URIAS A. ALMAGRO

New Berlin, Wisconsin, USA

duha ka balak bahin sa pagpamalak

1

Ang bulak

usa ka bulak

bisan kon asa

mobuklad.

Ug ang katahom

magpabiling katahom

bisag way mga mata

nga magtan-aw.

Apan ang balak

dili balak

kon way matandog

nga magbabasa.

2

Sa iyang balak,

American Sermon,

Si Jim Harrison nagsulat:

“Ang higala kong si Sam

may kita nga kinyentos ka dolyar

sulod sa 40 anyos

nga pagpanulat og mga balak.”

Apan kon dunay moingon

nga si Sam usa ka kapakyas,

ako dili mouyon.

Kay ang pagpanulat og mga balak

di kabilhan.

-- URIAS A. ALMAGRO

New Berlin, Wisconsin, USA

sa daang lingkoranan

Kilumkilom.  Sa wanang nga plasa,

bakante ug wa nay 

nanaglingkod sa mga lingkoranan.

Apan sa usa kanila

kadtong tua sa ilalom sa dakong akasya

ug bantang sa pagsalop sa adlaw,

kanunay’ng magpabiling maglingkod 

ang akong handurawan.

-- URIAS A. ALMAGRO

New Berlin, Wisconsin, USA

awa-ao: hubad sa balak ni Rowena Torrevillas

(alang kang Gemino Abad)

Sa pagsakay pagdulhog

Sa batoong dalan sa bukid

Gikan sa Balangay sa mga Magsusulat ngadto sa lungsod

Gisultihan ko ikaw sa usa ka pulong nga akong ningkat-onan

Gikan sa mga bukidnon.

Awa-ao: usa ka dapit nga mamingaw.

Ning adlawa nga nagsulat kita bahin sa pagsubo

Alang sa atong mga ginikanan: imo akong gipadad-an 

Og balak bahin sa kahaw-ang; wa ko ikaw

Sultihi sa lista nga akong gitipigan,

Sa mga pulong nga akong gihiram aron paghikaplag o paghikalimot

Ning ulahing mga adlaw.  Awa-ao: lanog sa usa ka bata’ng nahisalaag

Sa lasang sa kasub-anan o sa kahibudngan

Nga kalibotan sa pagkahingkod, nagpaabot

Sa pagdangat sa usa ka tawo’ng hamtong, ang amahan o inahan

Nga mobalik aron paghikaplag kanato. 

Gihubad ni:  

-- URIAS A. ALMAGRO

New Berlin, Wisconsin, USA

musa

Lalom nga kagabhion.

Ning tamboanan, nagpabilin

ako’ng nag-atang 

sa imong pagbalik.  

Ug unya kon akong hikit-an 

ang imong pagguho

gikan sa kangitngit,

pasigahon ko ang tanang suga

aron ang tibuok balay

mapuno sa kahayag.

Ug unya sa imong pag-abot,

ang akong kalag

mapuno sab sa imong kahayag.

-- URIAS A. ALMAGRO

New Berlin, Wisconsin, USA

hangyo

Kon ako

usa man lang ka dahon

nga nagpadulong

sa pagkalarag,

sagnga

unya ako

sa akong pagkatagak.

-- URIAS A. ALMAGRO

New Berlin, Wisconsin, USA     

anig-ig

Ang anig-ig

nagpadayon 

sa iyang pagdagayday.

Sa tingpamulak, sa ting-init,

sa tingpangatagak. Sa tingtugnaw,

usahay mahimong yelo,

apan sa ilalom

ang iyang tubig 

magpabilin.

Sa akong kasingkasing,

ang anig-ig

nagpadayon 

sa iyang pagdagayday.

-- URIAS A. ALMAGRO

New Berlin, Wisconsin, USA

paghandom

sa mga saad

nga nalarag

uban sa usa ka dahon

nga natagak

ug gianod

sa sapa sa kalimot

       

sa mga damgo

nga nagunaw

sa sulod

sa usa ka lusok sa luha

nga midaligdig

sa aping sa kagahapon


-- URIAS A. ALMAGRO

New Berlin, Wisconsin, USA

mga panganod

Akong nakita

ang paglabay sa mga panganod.

Ug ang langit

daw pisara nga gipapasan

sa kanhing mga sinulat.

Ug ako nahibalik

pagka usa ka gamay’ng bata

nga misulod sa lawak tunghaan.

Nagpaabot 

kon unsa ang isulat

sa pisara ning akong adlaw

nga unya papason

daw molabay’ng mga panganod.

-- URIAS A. ALMAGRO

New Berlin, Wisconsin, USA

kargador

"Life is heavier/ than the weight of all things." -- Rainer Maria Rilke

       

Ingon sa kargador,

daghang mga sako

sa pangandoy ug kapakyas

ang atong pas-anon

ning bodega sa kinabuhi.

-- URIAS A. ALMAGRO

New Berlin, Wisconsin, USA

takulahaw: eksperimento sa rima sa letra’ng 'w'

Kon takulahaw,

sa atong pagtikawtikaw,

dunay usa ka alindahaw

o usa ka antulihaw

nga mosayaw

sa ibabaw

sa bangaw,

ikaw ug ako motan-aw

sa way labaw

nga pagkalingaw. 

Apan bitaw

kini usa man lang ka tiaw

busa, magbabasa, ayaw

(ug gikidhatan ko ikaw)

pagkahanggaw

ning gamay’ng pasiaw.

Kanimo: Maayong adlaw.

-- URIAS A. ALMAGRO

New Berlin, Wisconsin, USA

sa hardin

Nagsulat kita’g 

mga balak sa katahom  

sa kaamyon sa mga bulak. 

Apan gawas niini 

unsa pa man gyod 

ang atong nahibaw-an?

Nga sila mobuklad

mangalawos mangatagak?

Ang buyog kansang katungdanan 

mao ra ang pagpaniba 

ug way kahibalo sa pagpamalak

tingali’g may labaw 

pang nahibaw-an

kay kanato.

-- URIAS A. ALMAGRO

New Berlin, Wisconsin, USA

mga langyaw

... after this our exile …

Gikan

kita

sa lainlaing mga dapit

nga nanganhi 

dinhi 

pag-apil ning pangilin.

Daghan kaayo kita

apan dako ang lamisa

ug dunay luna

alang sa tanan

pagtilaw

pag-ambit

sa tanang mga gidulot.

Uban ning tagay

ug pagbayaw

aron pagsugod

sa atong pagsaulog

magdungan kita 

pagbungat

ning malukpanong pangaliyupo:

Ginoo

sama kanimo

kami daghan apan usa ra.

Panalangini kami.

(alang sa tanang mga langyaw)

-- URIAS A. ALMAGRO

New Berlin, Wisconsin, USA

unsaon

Ang talaadlawan-- 

mahimong paklion

pagbasa 

kon unsa 

ang iyang sulod.

Ang antulang--

mahimong lungkabon

aron pagkaplag

sa perlas 

nga iyang gitipigan.

Apan 

unsaon ko man pag-abli

ang imong kahilom?

-- URIAS A. ALMAGRO

New Berlin, Wisconsin, USA

mga balas nga palasyo

Sa lapyahan

sa atong kabatan-on,

kadaghan kita maghimo 

og mga balas nga palasyo.

Kadaghan kita magdamgo.

Mga damgo nga mas taas

kay sa atong mga balas nga palasyo.

Apan ang kinabuhi baybayon lang 

sa paghunas ug pagtaob sa panahon. 

Ug ang mga balas nga palasyo

nga atong gihimo sa iyang lapyahan 

gibanlas ug nangagunaw 

sa paghasmag sa mga balod 

sa atong mga kapakyas.

-- URIAS A. ALMAGRO

New Berlin, Wisconsin, USA

adlaw sa minatay

Sa minteryo 

sa kilid sa lubong

ni Mama akong nabati

ang usa ka pagbulhot

sa bugnaw’ng hangin.

Ang bugnaw niyang kamot 

nga midapat 

sa akong agtang

sa akong pag-amen

kaniya.

-- URIAS A. ALMAGRO

Milwaukee, Wisconsin, U.S.A.

duha ka balak bahin sa panaghigala

1.

Naggunitay kita

ning atong paglakaw

sa samang dalan.

Layo na

ang ning-agian

sa atong panagkaila.

Apan tamdon ko 

nga ikaw tinuod nga higala

kon imo sab nga nabati

ang tunok

nga akong ningtumban.

2.

Nahawan ang lasang.

Gipamutol ang mga kahoy.

Apan dunay usa 

nga nahibilin sa kilid.  

Nagtindog, sama kanimo, 

tinuod kong higala,

dihang ang ubang daghan

mitalikod ug mibiya

kanako. 

-- URIAS A. ALMAGRO

New Berlin, Wisconsin, USA

kon ang bayolin: hubad sa balak ni Hafiz

Kon 

Ang bayolin

Makapasaylo sa kagahapon

Kini mosugod pagkanta.

Kon ang bayolin moundang pagkahasol

Sa umaabot

Ikaw mahimo’ng

Ingon sa hubog nga samokang mokatawa

Kana nga ang Ginoo

Mopahirag 

Ug mosugod pagsudlay kanimo ngadto

Sa Iyang

Buhok.

Kon ang bayolin makapasaylo

Sa matag samad nga hinimo

Sa uban

Ang kasingkasing mosugod

Pagkanta.

(gikan sa Inenglis ni Daniel Ladinsky) 

Gihubad ni: 

-- URIAS A. ALMAGRO

New Berlin, Wisconsin, USA