ang kapintas sa pangabubho ug kasubo

Nanagpaghot ang alindasay. Gilampornas ka 

sa imong gidangatan, ug gihamok ang imong 

bilahan—gahunghong, gabagulbol 

tadlas sa imong atngal, galanog- 

lanog hangtod sa imong kigol. Gakson ka 

sa katugnaw sa pagharong ug pagtuaw niining 

kamangtas, wa’y puas nga mihalok pag-usab 

sa imong nahiagoman. Nisulirat ka hangtod 

gadagayday ang wa’y kapuslanang damgo. 

Sarang bang mobanlaw ang luha sa muta? 

Lapsaw ang tagok sa hinashasang pag-inusara. 

 -- MICHAEL FLORENTINO
Ormoc City, Leyte, Philippines

hinay-hinay

Mingkipot ang mga mata 

sa kalangitan-- ang pagburak 

sa dag-om ug ang nagpungasi 

nga bunok hinay- 

hinay nang milurang. Inanay pod 

ang paglamoy sa sardinas ug 

ang paghigop sa noodles 

nga gipasingtan pagpila ni nanay. Hinay-

hinay na pod ang pagpatarok sa pagtuo, 

ang pagpaturok sa paglaom hulip sa tali-

hugno nga kalibotan.  Apan samtang hinay- 

hinay nga migimaw ang mga gihay 

sa kagahapon, ambot kon dili ba pod kaha 

kalit birahon sa lumong panahon 

sa paghandom ang nalubong 

nga lawas ni tatay? 

-- MICHAEL FLORENTINO 

Ormoc City, Leyte, Philippines

abo sa atong mga mata

Nangataktak, 

naglutaw-lutaw ang imong 

mga buak nga larawan 

nga giguhay-guhay sa talinis ug

kalit nakong pagkidhat. Unya, 

sa paghuros sa hangin, manuksok 

ug mang-uk-ok kini 

sa mga gingi-gingi sa atong kalimutaw 

ug magpangita sa tagsa-tagsa nila 

ka dapit. Lugoron o ipikat-pikat man 

sa tubod sa tin-awng sapa 

ilawom sa nagdagtom nga kalangitan--

mosamot kini pagdaghan, magtapok 

ug magtibug-ol hangtod mopilit 

sa salabotan. Busa, langga,

inig kaugdaw sa atong gihaling 

inig bundak sa uwan, 

manghangad unya ta ug

manghilam-os. 

 -- MICHAEL FLORENTINO 

Ormoc City, Leyte, Philippines

tipik sa igira

ikaw ang kinatas-ang sanga 

nga mituyhakaw sa kapanganoran 

ang bagtik mong panit taming sa naglagiting 

nga kidhat sa adlaw bisan pa man 

sa paraygong kablit sa buwan 

sa imong bukobuko nanurok ang mga gutling 

sa kalaay mga kahigwaos nga kanunayng 

mobatog sa nagkabawg nimong kasway 

mga gitik ug hapyod sa amihanang huyohoy 

nga makighagwa sa bidlisiw 

diha sa nataran sa imong dughan 

kanunay kang gahangad sa pagsawo sa alindahaw 

ug modayo'g duko sa pagbundak sa uwan 

layang piyuos ang imong mga mata 

nga misuway pagbukhad sa tungang gabii 

masulob-ong ritmo ang warawara 

sa imong mga dahon 

lig-on ang labyog sa imong mga tinguha 

sa makausa pa ikaw nasamaran 

nagarasan sa mga tiil ug tuka 

sa mga langgam nga mikabkab 

sa lunhaw mong mga udlot 

bus-ok imong mga bukton 

nga dangpanan sa mga nangapukan 

ang gaway sa kasub-anan mibalikos kanimo 

aron mahulma ang laing sanga 

matahom apan kahadlokan 

tam-is ang pagkaaslom sa imong mga bunga 

mangapunggak sa higayon nga matay-og 

ang kinadak-ang punoan 

apan hain na ba ang katul-id sa imong kalipay 

gibali-bali kaha sa mga unos sa higayon 

o sa kalit naputol sa paglabay sa panahon 

(alang kang J) 

-- MICHAEL FLORENTINO 

Ormoc City, Leyte, Philippines

/zipper/

gikulkog ko ang                    BUSLOT                natong kagahapon 

og nakil-kilan                           ANG                    talinis nakong kasakit 

nga mitarok lapos sa      PUNDIYOHAN         sa imong dughan 

ug mikulit og gisi                      SA                      hubag nimong ganghaan 

hinungdan nga atong         GUGMA                 mikalagiw sa kapakyasan 

-- MICHAEL FLORENTINO 

Ormoc City, Leyte, Philippines

wala na’y pagmugna

(tubag sa balak ni Ester Tapia nga "Ikaduhang Pagmugna") 

Nakipot na ang mga uwat sa kagabhion.

Ang imong taas nga hinanok usa na ka habog nga pangpang 

diin matagamtam ang katam-is sa nagdagayday nga pahiyom.

Andam na ang layag sa pagpanaw sa mga saag nga halok.

Susama ba kita’g gidamgo niining tungang gabii? 

Buot tikang gakson ibabaw sa bugnawng tore 

diin ang tingog sa kampana ang nagsinukliayng tinagubtob sa atong dughan, 

wala’y paglimbong, puno sa namuswak nga kamingaw--

sonata nga nagbanda-banda sa nagpakahilom natong mga kalag. 

Ang atong tinutokan mao ang mas hait sa pinuting duha’y suwab—

mihiwa sa mas labing tabunok natong kagahapon 

ug miyagyag sa tanang kaligutgot ug kasuko 

ug milukop pagbanaw sa tibuok syudad, salag, ug pantalan. 

Ug kita dili na sa atong kaugalingon, 

labaw pa niana, ikaw usa na ka babaye nga mihakop sa kagabhion 

ug ako usa ka silaw nga migitib sa pagyabo sa kabuntagon, 

ug dili na motakdol ang atong mga buwan. 

Wala na’y makapkap sa imong tinan-awan; 

ang imong dila puno na sa mga nangalawos nga dahon 

ang imong mata sa mga nangalarag nga humot sa rosas 

ug wala na’y pagpamukhad;

wala na’y pagpabilin. 

Buot unta tikang gakson og gakos sa tinghuwaw 

sa tanang bugnawng gabii, sa matag hunong sa gaway sa orasan sa pagpitik. 

Apan wala na’y lain pang pagmugna 

kay ikaw wala na, 

wala na, 

sa akong hunahuna.

-- MICHAEL FLORENTINO

Ormoc City, Leyte, Philippines

usa ka lusok

Mahagtak ang kataposang lusok sa uwan. 

Mokapyot siya tumoy sa nagyungyong nga dahon. 

Inigtayhop sa hangin, modailos siya’g matagak 

Sa bato, dayon hangpon sa umog nga yuta.

-- MICHAEL S. FLORENTINO

Ormoc City, Leyte, Philippines

exodus 10:21

          

             Ang taas nga panaw kanunayng nagasugod sa minugbo nga panghupaw— sa tinapsing nga tinan-awan sa kabigtasong katawhan nga sama’g mga sinawilik 

nga syagit sa nabuak ug nalubong nga mga pitad.

            Ang mga bata, tapoka ug paduk-a inig pahid sa dugo sa ilang salabotan. Ang mga tigulang, hukasi! 

            Susiha ang mga labhag sa ilang katuigan; kon taphaw ilang kalunhaw 

dili kini takos mogiya sa gagmay og mga pitad.

            Himoa’g kusog ang nagdilaab ninyong kaligutgot mga hamtong. Wisiki og pangaliya ang inyong mga tumong. Pabag-a ang inyong mga lapa-lapa, dubliha ang bugkos sa inyong mga laraw.

            Pangandam! Kupti gyod pagmaayo ang nagkahiplos ninyong mga pagtuo.

            Ang takna sa kangitngit andam nang mohiusa pagsuway sa tagsa-tagsa nato ka mga kahayag. Padayon sa panaw! Kay mao na kini ang haom nga takna sa pagduso sa nagkadaiyang pitad. Kaugalingon natong pitad. Ayaw ilingiw inyong paglantaw basin tukobon kini sa kangiob.

            Paninguha nga magpabilin kang magdilaab. Suklii ang kangitngit!

Batoki hangtod maabot nimo ang himaya! Pitad, pitad… ug pitad pa gyod!

Ayaw patapsing sa sidsid sa kangitngit kay lamyon ka niini! Kining mangtas

wa’y kaluoy.

            Bahala na’g magka-awop ang imong mga pitad, pitad lang gyod! 

Sakgawon ra ka sa kahayag.

-- MICHAEL FLORENTINO

Ormoc City, Leyte, Philippines

pagdayeg sa pagbiya

Yukbo-i ang kahilom sa biniyaan;

Hakopa ug ibayaw sa kamingawan 

Inig kagay ini nunot sa banha nga pagbiya. 

Malinawon ang gakos sa lamaong palda, 

Gapauraray sa buku-buko sa lingkoranan…
Nagkatag ang mga kuko ibabaw 

Sa lamesa. Napungpong ang mga lusok 

Sa buhok ibabaw sa unlan. 

Katagakon ang sudlay sa may bintana.
Nahayang ang sandal kilid sa pultahan.

Natibugol ang mga pahiyom ug luha,
Gitagi-tagi diha sa higdaanan.  

Ang hait nga tinukokan pino-pinoha, 

Ug isabwag ang anino sa nitikang palayo.
Yukbo-i ang kahilom sa biniyaan;
Hakopa ug ibayaw sa kamingawan.

-- MICHAEL FLORENTINO

Ormoc City, Leyte, Philippines

black hole

Dili sayon matagak diha sa kagahapon 

nga andam na sab unta natong sak-on. 

Sama pananglit sa taas nga pagbinat
sa atong mga kamot aron sa paghangop kanato,
sa atong dungan nga pagtikang diha sa higdaanan
nga miduot ug mipalubong,
ang pagtuasik sa kamingaw
nga gipaagi nato sa pag-akob diha sa halok,
ug sa nasaksihan tang pag-inat sa kaugalingon
nga mibalikos sa matag-usa kanato. 

Dili sayon ang buot natong paglingkawas niini—
adunay igong luna ang gikinahanglang abton
aron mahimulag kita niini,
tukma nga pagpilo-pilo ug pagbuho sa panahon
aron makalusot kita niini,
igo nga kaisog sa pagsalibay sa mga butang biniyaan
aron malimot kita niini. 

Ug kon dili gani nato maabtan ang pagbuto 
sa mga butang diri kanato, 
suyopa nalang ko’g balik diha kanimo. 
Patuyoka ko’g balik sa imong kasing-kasing.
Palutawa ko’g balik sa imong huna-huna, 
ug putsa na gyod ko’g maayo sa imong kangitngit.
 
Kay nianang higayona, kon imo kong tugotan 
pag-abli balik sa imong kaugalingon, 
andam kong kalimtan ang tanan: 
ang takna, luna, ug ang mga biniyaan natong mga butang 
nga buot molalang ug lain-laing duha kanato.

-- MICHAEL S. FLORENTINO

Ormoc City, Leyte, Philippines