11.29.2015

retorika sa romansa


nanginit namugnaw
kining kaadlawon
tugbang sa udtong tutok  
sahi sa talagsaong kalipay
lakbit sa imong kasakit
kay bag-ohay lang nagdugo
ang daang samad 
nga ang kapula nadanlog
sa lunsay nga kaputi
duyog sa dagayday
nga luha sa kalipay

patya ako sa kalalim
aron banhawon na pod
ang salimuang unya
sa lain pang langit


-- DESIDERIO R. LIBRE 
Samboan, Cebu, Philippines

kay lisod mahinanok gikan sa laylay sa kamingaw,


patamboon ko akong dughan
ngadto sa bukid diin nagbubo ang Tumalog Falls.
mamisbis ang bukid og pahiyom,
magdalit og kabugnaw nga makabadbad sa nagpangupot nga huwaw,
maghukad og katugsawan nga mohilis sa makapaso.

patamboon ko akong dughan
ngadto sa bukid diin nagbubo ang Tumalog Falls
aron taliwala ning kauhaw sa nagdagayday nga tubig
nga gibaylo ko sa nagsugwak nga lana,
may moduyog kanako dinhi sa disyerto
diin ako gianod sa paghubas.

patamboon ko akong dughan
ngadto sa bukid diin nagbubo ang Tumalog Falls
aron mahulipa’g mga bugnaw’ng bungtod ang nagbukal nga patag.
aron bisan taliwala sa kauga ug kainit,
padayong modagayday akong kusog
sama sa makanunayong pagbubo sa Tumalog Falls.


-- DESIREE L. BALOTA
 
Talisay City, Cebu, Philippines

11.27.2015

tulo ka tinagurha nga lanog alang sa kasingkasing nga bun-og


1.
Gikaluhaan og katugnaw, kita tuod gihimugso
Nga galanog sa kabangis sama sa adlaw: hubo. 
2.
Wala'y uwaw ang kasubo, kanunay magtuwad. 
Lubota lang! Kon mosulirap ka, hala, hangad!  
3.
Bisan ang gasinaw nga uwat usa lang ka lamat
Kon dili duhiraw ang mga paagi sa pasalamat. 


-- MICHAEL U. OBENIETA 
Topeka, Kansas, USA

mga tipik


Kay lagi nahadlok ka
nga masakitan, gagmay ra

nga mga tipik
sa imong kasing-kasing
ang imong gipaambit--
karon,
unya,
ugma

ug sa sunod na pod

nga higayon. Ug wala nimo
damha sa paglabay
sa mga adlaw
wala na’y 
makusnit,
nahurot na

ang tibuok nga gitipigan
sulod sa imong dughan.


-- JOLIE ANN R. CARTUCIANO 
Cebu City, Philippines

11.25.2015

ang kinaiyahan sa libak


Liyok ang taras niini: 
takod-takod, 
tagod-tagod.

Ang baligtos, kasagaran, 
kinaiya sa kagaw 
kansang tuyo mao ang pagtukob 
aron mogimok, mokuyanap, ug moulbo 
ngadto sa usa ka katalagman.

Sukwahi sa gituohan, ang kagaw 
adunay iyang paminsar. Ang iyang lihok
sa paglungtad sama sa mga sandayong 
sa hunahuna sa tawo. Nasayod ang kagaw 
nga sa kadugayan aduna ra gihapo'y motiros
kaniya, busa, iyang gilikopan ang iyang lawas
og mga tagiptip ug kiki. Iyawat na lang 
mahimo kining mga taming. 

Tungod kay tira pasagad ang kagaw,
dili igo alang kaniya ang paglata
sa itlog sa agta. Lukpon niya 
ang kalaksot. Iyang baba galamlam
og malisya. Manakod kini. Tinalikod 
o tinuwaray. Kinulirahay og laway o dugo.
Walay pili. Daghan ang mahiagom. Lagmit 
tibuok banay.

Ang nakalahi sa tunhay nga tawo 
anaa sa gipang-agay sa mga sandayong
sulod kaniya, nga maoy motulod
sa nisangad, nga maoy motubos
sa gilumsan, nga maoy motayhop
sa kahapdos. 

Wala'y katakos ang kagaw niini.
Iya kini sa tawo. Kaniya lamang.
Magtakod-takod, apan dili
motagod-tagod. 


-- CORAZON M. ALMERINO
Los Angeles, California, USA

alang sa mga bag-ong subol nga magbabalak


Mag-unsa man ang kalab-as
anang barilis, nukos, ibis,
ug bag-ong gipupo nga luy-a,
sibuyas-bombay ug limonsito
nga isagol unya sa suka 
kon kuwang ang timpla sa asin 
ug kon ang ngabil dili mobudlot  
sa halang nga siling kulikot. 


-- JONDY M. ARPILLEDA
Tandag City, Surigao del Sur, Philippines

11.23.2015

alang sa pinangga kong shopaholic*


Igo ra gyod kong gaugot samtang ikaw 
gayaka'g pangukay. Pagkahugot 
sa imong mubo ug piot nga purol. 
Ang tudlo sa orasan niungot. 
Ug kalit lang ang takla nitihol
sa kahilom: nainat, nagisi, nakisaw...

------------------------------------------------
* shopaholic: dinuwa nga pulong sa kusog mag-shopping

-- TON DAPOSALA
Cagayan de Oro City, Philippines 

kon ang gugma usa ka mananggiti


Unta ang atong gugma
Tugbang sa usa ka mananggiti.
Ato kining makita
Nga taghoy-taghoyan
Ang inadlaw-adlaw nga purohan 
Sa pagkatagak. Kanimo 
Nga duna'y kahadlok sa kahabog 
Buot nakong ipakita 
Nga ang tanang butang
Makat-onan. Bisan ang kusog sa 
Pagkahagbong mahimo ra diay 
Nga atong bulhot-bulhotan og sigarilyo
Samtang nagtan-aw paubos
Sa aliwaros nga kalibotan.
Gaan tingali ang pamati
Kon maabtan na nato ang kataas
Sa atong panaghigugmaay.
Sama ba kaha kagaan sa mga uwak
Nga kanunay taas ang linuparan?
Ang tubag tingali masiplatan ra 
Sa higayon nga kitang duha 
Maghangad sa lubi nga wala'y 
Mga bunga, wala duawa 
Sa mananggiti nga nabug-atan
Sa kaugalingong mga tuhod.


-- ADONIS R. ENRICUSO
Dumingag, Zamboanga del Sur, Philippines

11.21.2015

tali sa kasagaran ug hinanali


dinhi sa gamay nga dakbayan sa Dipog
luag pa ang menteryo
lapad pa ang mga dalan

pwerting pamunga 
sa mga bulahan ug mga durian
ning adlaw sa mga kalag

wala ang kahadlok kun kaikag
magkaila kuno tanan dinhi
ang mga patay ug mga buhi
ang mga kalag ug dili ingon nato

saksak sinagol ang mga balita dinhi
dunay gibuhian niadtong myerkoles
ug niadtong hwebes pod
naa sab ang usa nga giputlan og liog


-- RIC S. BASTASA
Katipunan, Zamboanga del Norte, Philippines

pag-alim


Agoy, dong! Bisa'g unsaon pa nimo paghapuhap
pinaagi sa humot ug humok mong mga pulong
pakapinan pa og pahiyom ug mga gasa, 

dili na siya maghinangol pa. Kining samara
hagbay rang gihunaran sa akong mga luha, 
gibunbonan pa og dinukdok nga tambal

sa pagkalimot ug paghuwat nga makakubal
hulip sa kugan ug dakong uwat nga usahay pod
mongulngol atol sa ting-uwan nga kagabhion.

Ay, sus, dong! Makahubog gyod ra ba intawon 
ang padayong pagyarok sa mefenamic nga asido
bisan gapanilap gihapon si Dr. Kupido. 


-- LOVELY ROSS AI R. MENDOZA 
Talisay City, Cebu, Philippines

11.19.2015

hubad sa Iningles ni Charles Reznikoff


Ang Tigulang

Ang isda daghan ra kaayo og bukog 
ug ang pakwan daghan ra kaayo og liso. 


-- VICENTE VIVENCIO BANDILLO
Dhaka, Bangladesh

uwan


Unsaon pag-ikyas sa hapuhap 
sa imong pagkawala?

Matag higayong kusog ang bunok  
sa uwan, unang mobaha 
ang dughan sa pagkamingaw 
kaysa balisbisang gilaktan mo 
paingon sa dakong isla
Sa mga Japayuki ug pantasya. 

Milanog ang protesta 
sa dugdog kaniadto 
apan dili mahimong babagan
ang bungol mong balatian.
Ug ako, naglingkod 
sa suok ning kasingkasing 
nga miuwan na sad, 
nangandoyng' patalinghogan,
duyog sa patak-uwan, 
sa luwang  sa atong 
panagbuwag ang hinayng 
tunob sa imong pagbiya.
Kilat man god kang kalit 
mikiblat sa akong kalimutaw. 

Ug karon, miuwan na sad.
Duyog sa mga patak sa may
balisbisan, unta mga tunob mo na
kana sa atong hagdanan.


-- NOEL P. TUAZON
Dauis, Bohol, Philippines

11.17.2015

sab-it


I
Mas lisod kuhaon ang nukos itandi sa isda. Tungod ni kay dili nila
malamoy ang tibuok paon; ginagmay ilang ingkib. Inig bulos gikan
pag-ariya, dili gayod mosakat ang taga. Labing maayo kon dili bungol
og kamot. Inig naa'y mohawid, unya hinay nga moguyod, ayaw'g busla!
Pasagdi, ug ariyahi. Basin pa'g nukos na kini...

II
Talisalop ang adlaw. Ang pantalan mingaw. Wala'y namasol apan diha'y
duha ka iro nangawat-kawat sa gibulad nga kopras. Bisan gamay, wala
maglihok ang mga dahon. Ang dagat nga daw giplantsa sa naglagiting nga
adlaw wala'y kunot sa mga balod kutob sa maabot sa panan-aw.

III
Hunasan, talab-on ang hinay nga sulog. Nindot kaayong iitsa-itsa.
Magpalundag ko, akong ipabatang. Kinadak-an akong gidalang pasol,
numero saysenta. Ang paon, tamban. Sobra sa pamahaw ganiha, giasinan.
Giikog ko pagpakat, gipaagi luyo sa bukog. Akong tan-aw malungis pa'y
ilong ini sa kabaw. Gikan giitsa sa lawod, giariyahan og duha ka dupa,
ug ang naylon gidat-ogan sa pulunan. Dayon milingkod ko sa ganton,
gilamat sa lana-nga-kahamis sa dagat. Gasalingay ko'g sima-sima og
mani samtang gahunahuna sa tinolang katambak o kaha bantolon. Ang
mamsa o lambayawan, nga maoy sagad nga manbad magsunodsunod sa duot sa
tamban-- talagsa ra mokaon kon patay ang paon. Pagbagting sa orasyon,
mibali ang sulog, ug mas maayo nga mobalhin didto sa pikas tumoy sa
pantalan. Daghan man gud pod ang moingon nga tiyempo kuno sa pagpangaon
sa isda ang pagbali sa sulog. Ang kuyaw lang kay naa'y salaitan diring
dapita. Kon isda sa bato ang mokaon, unya dili ka kahawid kay gamay ra'g
naylon, sigurado, adto sa salait paingon.

IV
Gahaguros ang naylon pag-itsa ko sa lawod. Wala pa gani ko kalingkod
nabati ko nga diha'y mihawid. Gatuo ko'g balo, gahulat ko nga modagan
(molangoy kon pilosopo ang kaistorya), apan gapaanod ra ang kanahan.
Gikulbaan ko (Unsaon na lang kon nukos ni?) Gibira ko og hinay, mouban
ra. Nukos gyod. Diha-diha gikulbaan ko. Sa hinawiran akong paminaw
dakodako ning nukosa. Sayod kong dili gayod magdugay, dali ra kaayong
hutdon ang paon nga tamban. Labaw pa, unsaon ko man pagkuha ining
abata nga wala man ko magdalag sab-it. Nagpanglingi ko apan wala'y
laing tawo. Bag-ong dagsa ni, dili gani molugnot, mouban ra sa
pagbira. Pag-abot sa duol, maklaro na. Nukos gyod! Gapula, pwerteng
dakoa! Mao gyod kadak-a sa akong Spartan nga dyis-medya. Mao pod tingali
ni ang giingon, so nir yet so par. Diha ra ang nuko sa sa tungod, galutaw,
gadupa. Apan wala koy gamit pagkuha niini. Daghan ang misantop sa
akong hunahuna-- salapang, indyanpana, salibot, bato, tirador-- apan
wala'y diha sa duol bisan usa. Gapanglingolingo ko. Sa ubos klaro kaayo
nga gamay na lang ang nahabilin sa tamban. Dili magdugay mamuhi na
ning nukosa. Nakahunahuna ko nga bun-on na la'g tsinelas...

V
Usa ra ang nahabilin nga kapilian, buslon ko ni. Patsamba, pamahala na!
Milingiw ko'g gamay, ug nihangad sa langit. Apan dili para manalangin.
Uroy hungaw akong bulos dili ko ganahan nga maagtang o kaha maigo ba sa
mata. Usa, duha, mihunat ko, dayong bulos! Ug wala damha, usa ka
kilumkilom sa ting-init, miulan og ata ang langit.


-- DON FERROLINO
Norzagaray, Bulacan, Philippines

ang pagbiya


Tutoki ang bungbong.
Ang mga gidibuho nimo niadtong 
bata pa ka hagbay rang napanas,
nakadlit na kini sa delubyo
nga wala nato damha.

Ang atong mga sapatos ug tsinelas,
mga vinyl ug cassette,
mga kaldero ug kalan,
naanod na sa kawanangan.

Kinahanglan na natong
putoson og mantalaan ang mga baso
ug piloon ang mga nabiling sinina
aron isulod sa mga karton.

Buhii ang mga mga handurawan
nga gababag sa gilaraw nga paghawa. 
Karon lang ni. Laomi lang
nga bisan asa man ta mahimutang,
aduna ka'y puloy-anan nako.


-- MAI SANTILLAN
Cagayan de Oro City, Philippines

11.15.2015

benign prostatic hyperplasia


Resulta na kini sa 71 ka mga orgasmong tuig
Ang pabrika sa mga tulos namungingi nangigdal na
Sa udtong gabii hangtod sayo sa buntag
Madungog sa kadulang kadulog ang akong pagbalikbalik
Pagbisibis sa gibus-aw nagbilangkad nga inidoro


-- MELQUIADITO M. ALLEGO
Lake City, Florida, USA

kadtong duha ka persona nga akong nailhang nagdupa


Hubo. 
Kinabuhing halad alang sa tanan.
Hagbay rang gipaila-ila ni mama
Gikan pa sa lola sa iyang lola.
Among dumdomon matag semana.

Hubo.
Atol sa kasumaran daghan 
Ang modumdom bahala'g mapandol
Dili paulahi sa panaad nga gitultol
Bisan sa mga wala'y purol!


-- DESIDERIO R. LIBRE
Samboan, Cebu, Philippines

11.13.2015

labaw sa baha


Ang bahakhak sa mga bata
nga nag-ubog sa baha,
lanog labaw pa sa pagdaguok
sa dalugdog. Wala’y kabalaka
nga masamin diha
sa ilang mga mata
bisan pa man og ang sulog
mianod sa bagang panganod.

Di mosalir ang hilanat.
Di makapakurat ang kilat.
Di makapakurog ang dalugdog.

Nahisama lang unta ta
niining mga bataa—
yano rang moubog
sa bisan unsang sulog.


-- GRATIAN PAUL R. TIDOR
Dipolog City,  Zambonga del Norte, Philippines

ispidno


liboan ka ikogan nagpangita sa mubong kutsara.
erehes kibol naglumpayat sa lawom nga panaksan.
serpenteng layaw, sa tumoy sa dila ang pangutana.
dili matukma, lubagon mo man ang timbangan.

erehes kibol miambak gikan sa panaksan
aron lang matumpawak sa nanungog nga kalayo
walay kalinaw, lubagon mo man ang timbangan.
bisan sa kahilom, malimbungon ang panghaylo.

walay pagpasaylo nga makalingkawas sa kalayo.
bisan ang kaayo, may andam nga pabilo sa tumoy
bisan ang kahilom, bisan ang pagpanghaylo
naghuwat mobuto. kon kanus-a? ambot uroy!

kon kanus-a duslitan ang pabilo sa tumoy?
sigon ra s serpenteng  nagpanilap sa pangutana
busog sa saad, nagluno, naghuwat (ug way umoy)
sa liboan ka ikogang nag-inilogay sa kutsara.


-- ERIK E. TUBAN 
Cordova, Cebu, Philippines

11.11.2015

ang gihagawhaw sa mga bituon panahon sa tingtugnaw


Pasagdi na lang ang mga dahon-- gatikawtikaw sa kadaplinan, giguyod sa hangin. O, adlaw! Bahini intawon ko sa imong kasilag samtang gipanuhot ang panganod. Ugma, bisan magkapurigit ang langit, dili mamugnaw akong hagit nimo. Bisan pa'g kanunay manuhik ang haguros sa urom, galugti kanunay sa mga sanga, magbitay gihapon ang tulilik nakong kasingkasing. Gwatsinanggo ra ba ang damgo-- motuhik-tuhik sa bangaw nga gihubit sa gadiwalwal nga kahilom sa mga gahikog. Bisan pa'g mabungi ang pahiyom sa buwan, dili ko mopiyong. Bahala na'g manglagom, mamuwaw gihapon ko sa akong paghangad. Huwaton ko ikaw, wala'y pagkalaay sa imong panimalos nga halad sa dili maihap nakong pagkaugdaw. 

-- MICHAEL U. OBENIETA 
Topeka, Kansas, USA

panumbaling


Tungod sa katam-is   
nga gihanyag sa nanguyab,
wala nuon mabatyagi ni Inday
ang tagsing nga piyak sa tamsi
nga gapangita sa iyang pispis
nga nahisalaag sa salag
dihang gakat-on og lupad.


-- JONDY M. ARPILLEDA
Tandag City, Surigao del Sur, Philippines

11.09.2015

baki


Sa mga higayong sama niini:
magkalagasak ang bunok-uwan
sa mga dahon ug mohapyod 
ang kabugnaw sa amihan,
madungog ko na usab 
ang hudyaka sa mga baki: 
magsauysaoy, manungog
sa akong pag-inusara. 
Unsaon, mibiya kang wa gani
magpahibawo kon mobalik pa.
Di man nako tuyoon, 
ang ilang awit manuktok 
sa akong kasingkasing, 
mosuhot sa balatian ug hilantan 
ang galamhan sa kamingaw.
Bisag kada gabii kong 
nangandoy nga hulipan 
ang sauysaoy nilang hudyaka 
sa kainit sa ato unyang katawa,
ayaw ko'g ingna nga akong kutloon 
pag-usab ang lain pang gabii 
nga ikaw handomong moabot?
Ugma, dakpon ko'g kan-on 
ang tanang mga baki. 


-- NOEL P. TUAZON
Dauis, Bohol, Philippines

distansya


Bisan duol ra
ang imong gitutokan,

ang nahunahunaan
haskang layoa.


-- JOLIE ANN R. CARTUCIANO
Cebu City, Philippines

11.07.2015

tunok


Higugmaon ko ikaw ingon  
sa unang higayon kining pagbati

miturok hangtod milabong,
mamuwak, mounay nako'g balik

og lain pang halad nga higayon 
sa akong pagkasamad.


-- MANUEL M. AVENIDO, JR.
Talibon, Bohol, Philippines

pagpaambit sa kasakit


“Knowing is in the writing.” – Butch Dalisay

Matod mo madyikira ko
kay makakutlo ko’g mga pulong 
gikan sa hangin. Tingali,

buot nimong ipasabot 
sadista ko 

kay giukang nako 
ang mga samad 
nga dugay nang nakugan
aron ang dugay nang nalubong
angay gihapong kawton 
aron masabtan ug masaw-an
kining sugilanon.


-- MAI SANTILLAN
Cagayan de Oro City, Philippines

11.05.2015

bakikaw nga panaghimamat


Pula ang nawong sa batan-ong negosyante nga migawas sa kasilyas sa ayroplano, kaha tungod kay gikan siyang nagkapuliki og utong-utong aron moariya ang himsog nga gumuguho apan malagmit nanginit ang iyang mga aping gumikan sa wala-tuyoang pagtinutokay tali kaniya ug sa desente og hitsura nga dalaga nga maoy kinaunhan sa naghulat nga mobanos og gamit sa hagip-ot nga lawak tungod kay, agoy! naglabok-labok pa sa sulod ang baho sa gideposito niyang ebidensiya sa haruhay niyang kinabuhi (nga gipamatud-an sa baboyon niyang dagway ug sa gilamoy niya sa miaging gabii nga whole Channel Island red sea urchin ug pan-seared foie gras with figs and port wine sauce uban sa duha ka bigot ug malamatong mga linalang nga nagdalit kaniya og hinanaling kalipay).


-- VICENTE VIVENCIO BANDILLO
Dhaka, Bangladesh

kalami sa gidili


lad-ang ang timpla sa atong panagtagik
daghang nangausik 

puti ang tinta nga nawitik sa akong papel 
adunay tipik nga dakong mata 
sa ungo nga misiplat sa gamayng buho 

wala panumbalinga sa atong kahinanok 
ang kasamok ug syagit kabahin 
sa sunog didto sa unahan

nagmantika kuno ang mga bombero 
sa dakbayan nga abo


-- RIC S. BASTASA
Katipunan, Zamboanga del Norte, Philippines

11.03.2015

1994: baynte uno ka tuig


Matag hapon, mopalit ko 
og tsamporado.

Layo pa gani ko, makighagwa na
ang kahumot sa tableya sa eskina. 
Ang  tibuok kahaponon ang akong dulaanan.

Dihang ukayon na kini, magtago-tago dayon
ang mga tableya sa kaputi sa kan-on. 
Inig luto, pakapinan og gatas panagsa.

Magkamuritsing ang nawong,
mamantsahan sa tabonong
tsokolate ang sinina tungod sa kalipay. 

Usa ka hapon, nahanaw ra
ang kahumot sa tableya. 

-- CINDY VELASQUEZ
Cebu City, Philippines

tipaka sa kahangtoran


Tin-aw pa gihapon sa akong panumdoman
Ang bayhon ni lolo nga gasud-ong 
Sa kuwang nakong kabuot dihang
Mitampisaw ko sa lim-aw.

Bisan og dugay nang napapas 

Kadtong sayong kabuntagon,
Ang bayhon ni lolo nasud-ong nako
Sa una kong pagtikang sa tunghaan--
Tin-aw pa gihapon sa akong panumdoman.


-- DON FERROLINO
Norzagaray, Bulacan, Philippines

11.01.2015

pag-uban, pagdala


Nahunahunaan nimo
Ang pagduaw sa dakong krus
Bisan dili ikaw ang namatyan.
Dili kaha kay sa laing kinabuhi, nawad-an ka 
Ug nabiyaan? Tingali pod ang imong kasubo
Alang sa umaabot-- sa mga hinigugma 
Ug mga motaliwan nga dili na 
Maabtan. Ang kinabuhi 
Mubo; taas ang pag-antos. 
Busa ikaw mipunit og kandila, 
Dayon gidagkotan buyon sa kadaghanan 
Nga gipahinungod sa nagkalain-
Laing dagway sa pagdumdom. Nunot 
Sa kahilom nga wa'y pag-ampo, mibiya ka
Dala ang bag-ong pagtuo.


-- ADONIS R. ENRICUSO
Dumingag, Zamboanga del Sur, Philippines

handuraw


alang kay JMR (1993-2009)

Otso anyos. Nag-inusara, 
suot ang karsones nga gipatikan 
og rosadong bulak. Alas otso kadto. Sa hardin,
Gikahinabi ang mga patay nga bromeliad,
ang mga miturok nga mga binhi sa monggos,
ug ang mga banhang manghak.
Sa lawak, gatinga akong apohan.
Nakadakop ko'g gaminap. Kupot 
sa kamot. Gipitlod ang usa ka tiil sa linalang
kamulong hugong ang Dayang-dayang
gikan sa radyong maas.
Dagmalan. Daotan. Muoli lang akong amahan
kon nakabuhat ko'g daotan, ug dayon
pasakitan ko kay gahi kuno ko'g ulo. Humok
og bat-ang. Usa ka tiil, usa na pod.
Usa ka tiil na sab. Sa pagkamang sa oras,
wala nako naka-alinggat. Wala na'y mga tiil.
Wala pa akong amahan. Gitaktak na 
ang gaminap, tumban sa yuta.
Sa lawak, gatinga gihapon akong apohan.
Iyang lawas sama sa gaminap 
nga gidabok nako sa bato. Mao kadto 
ang labing ulahi nga adlaw sa ting-init, 
napulog-upat ka tuig na ang milabay. 
Wala pa gihapon akong amahan.


-- ALTON MELVAR M. DAPANAS
Cagayan de Oro City, Philippines

Daghang salamat sa mga maniniyot nga gapaambit sa ilang mga hulagway sa Google ug Flickr.