pag-ampo sa dagat sa kahaponon

O adlaw nga madasigon
pasinawa
ang mga perlas
sa nagduyan
kong dughan.

O adlaw nga madasigon
pataopa
ang imong sidlak
sa akong lawom
nga lawod.

-- KARLA G. QUIMSING
Cebu City, Philippines

kahilom nga dili nimo ikabungat

(tubag kang Butch Bandillo)
















“Ang kahilom nga dili ko pa ikabungat
Maoy makabuak sa kahilom sa gugma.
Sama kahilom sa kahiladman sa dagat
Ang kahilom nga dili ko pa ikabungat.
Hulata ang pasiklap kong sama sa kilat,
Pahiyom kong mobatog sa imong katawa—
Ang kahilom nga dili ko pa ikabungat
Maoy makabuak sa kahilom sa gugma.”

Dili ko makadungog sa kahilom.
Ikaw dong, makadungog diay ka?
Madunggan ba nimo ang akong mga pahiyom?
Madunggan ba nimo ang akong mga kawot?
Madunggan nimo kon gunitan nako ang imong
Kamot?
Bungol, dili lagi mga tingog ang makabuak
Sa kahilom sa gugma.
Unsa? Kahiladman sa dagat? Pasiklap sa kilat?
Saba diha.
Mokanta lang ang dagat kung naa hungihong ang hangin.
Saba diha. Dili lang ka bungol
Buta pa jud ka!
Ang kilat makita lang sa kangitngit.
Padungga ko sa tukar sa kilat.
Mao na ang pagsabot nato
Nga gihigugma ko nimo.


-- KARLA G. QUIMSING
Ilo-ilo City, Philippines

sa kaila nako nga musikero

(Bislonggo nga Balak)

Sa kaila nako nga musikero
ngilngig mogitara, kahibalo sa tanan nga kanta
miyembro pa jud sa usa ka banda.
Bungol ka. Oo, bungol ka.
Gapaminaw lang ka,
sa mga dalugdog nga kasuko
sa mga buto nga kasakit
sa mga lagatik nga kasubo.
Gapaminaw lang ka,
sa mga siyagit nga pagbasol
sa mga aguroy nga kamingaw
sa mga uwang nga kahadlok.
Aduna ko’y sekreto ihulog
sa imo way gamit nga dunggan.
Paminaw, bungol.
Sepraha kuno ang tingog sa akong buhok
kung mo haplas ni sa imong nawong.
Sepraha usab ang tono sa mga ginhawa
kung magtagbo ang mga bibig natong duha.
Paminaw, bungol.
Dili ang linahugay sa dalugdog, buto, lagatik,
siyagit, aguroy, uwang
ang makabuak sa kahilom sa gugma.
Paminaw, bungol.
Paminaw sa awit, sa huni, sa balak
Sa akong mga hunghong.


-- KARLA G. QUIMSING
Ilo-ilo City, Philippines