videoke

Nindot og tingog. 

Sakto sa tayming ug tono 

apan gamay’g grado, 

gibato pa’g kamatis 

diha sa entablado. 

Ang nindot og tingog 

wa kapiog sa kontrang 

mora’g nakaigit dihang 

nibirit. Pataka la’g sulod, 

gabudlot-budlot ang simod 

daw esol sa pabo 

ug bisag nasaag sa tono 

Gatos ang porsyento 

ug dungan sa kombo, 

You are a perfect singer! 

Namakpak, nanayaw pa 

ang nanan-aw. 

Ni-request og laing birit. 

Nangapil og kanta. 

Pwerting yabaga!

Nadunggan sa tibuok 

kalibotan. Mga tawo tanan 

natakdan. Nilanog-- 

mga yabag nga tingog. 

Nibandabanda 

sa mga planeta 

ug nagkalainlaing

solar system. 

Mga UFO nanglupad. 

Mga bituon nakay-ag. 

Ang syagit sa mga alien 

lanog pa sa dalugdog, 

na-pick up sa mikropono. 

Gatos ang porsyento 

ug dungan sa kombo, 

You are a perfect singer! 

-- JOSUA S. CABRERA 

Liloan, Cebu, Philippines

mata na, kwarisma na!

Mata na, kwarisma na! 

Kao'g binignit 

Sa tiyan manggunit. 

Ang kabuhi 

Di makabuhi. 

Paresa'g kape 

Sa tiyan mangarate.

Balibalihon og laparo 

Ilong sa berdugo. 

Mata na, kwarisma na! 

I-ugbok ang kuros 

Dugo ihilam-os 

Dayon manguros. 

Ikorona ang virus. 

Tin tin de serapen

Human sa quaratine 

Bilbil hilisan 

Tin tin pakupsan. 

Mata na, kwarisma na! 

Kaubo ang mogawas

Tugka'g almuranas, 

Hilantan ka'g kalayo 

Init pas impyerno.

Tambal sa butbot 

Sigbin nga palautot,

Utok nga gipanuhot 

Tai sa kanding daot. 

Mata na, kwarisma na! 

Luha ipanghunaw 

Mga kagaw nagyagaw. 

Mga maskara nanglakaw, 

Nalisang sa mga taw. 

Mikurog og kalit,

Gisubawan ang kasakit

Sa mamahit nga kainit. 

Gipaningot ang langit.

 -- JOSUA S. CABRERA
Liloan, Cebu, Philippines

quarantine

Sa akong kwarto 

Ang kisame, ang kusina 

Makab-ot ra. 

Lihok gamay 

Naay mokagay, molanog 

Tibuok balay. 

Kon naay moubo 

Double lock ang kwarto; 

Hunaw pag-ayo.

Mouyog pikas kwarto 

Morag naminaw ko

Og porno sa radyo. 

Galatagaw ang utok. 

Gatutok sa facebook. 

Naboang sa tiktok. 

Celfon kong gamay 

Gisugo nakos Hawaii; 

Gidalhan kog samurai 

May tv kong dako 

Bantog rang nagdukoduko 

Nakakita diayg bugno 

Oh, look at the moon! 

Covid ni Ramon, ihapak sa agtang. 

Di kaha ka maboang! 

Oh, mother, mother, I am sick. 

Call the doctor very quick 

Doctor said you'll be fine 

Coz your sickness is just like mine! 

 -- JOSUA S. CABRERA

Liloan, Cebu, Philippines

kunsad

Human nimo’g titi 

sa mga utin ning kalibotan,

layat, bilat, sama sa bakunawa;

ang buwan lamoya. 

Kon di pa ka matagbaw,

apila ang adlaw, hasta

ang mga planeta

nga gaalirong 

niini. 

Apan kon ugaling

bation gihapon nimo 

ang kahaw-ang,

suyopa ang mga bituon,

ang oras, ug ang kawanangan.

Ipahiluna silang tanan

aron mahinanok

sulod sa imong

sabakan.

-- JOSUA S. CABRERA


Cebu City, Philippines

lawas

Pananglit, akong lawas, akong gihukas.  

Asa mopasilong ang kasakit? 

Asa mopaharuhay ang kalipay?  

Sama ra sad kung asa padulong ang tuba kung walay sugong

Samtang kini maghulat kung kanus-a mobukhad  

Ang kagabhion ug kabuntagon 

Sa dihang malusno ang langit?  

Unsay pulos sa handumanan
Kon walay kagahapon  

Ug unsa kahay mahitabo sa dawat  

Kon walay pito ka Biyernes nga moabot?  

Asa mopasilong ang kasakit? 

Asa mopaharuhay ang kalipay?  

Kon pananglit, akong lawas, akong gihukas.

-- JOSUA S. CABRERA


Cebu City, Philippines

hoy, alimukon!

Hoy, Alimukon, ang imong mga pako

Langit ang gilapdon! Ang kanawkanaw

Puwede lang nimong dangawon. Lisora

Baya nimong dakpon. Apan pasensya ka

Kay mat-an pa kos pinya. Nalit-ag ko lang

Gihapon ka ug nahalwa. Pareho lang

Mong Tatay, igmat kuno, pero sa prisohan

Tugpa pagbuto sa martial law.

Hoy, Alimukon, matod pang Tatay

Nindot puy-an ang bukid kay hayahay.

Duol sa yuta ug ubos sa adlaw,

Ang mga kahoy kanato mopaypay.

Ang atong singot, sa hangin pahiran.

Mao nang ilawom sa manggahan,

Kalipay gyud namong tatay ang magbunglay,

Samtang magdegamo sa among paniudto si nanay.

Hoy, Alimukon, sa sabaw sa linaw-oy

 Moalisngaw ang among kakapoy.

Apan karon wan-as tatay ug ang iyang

Panaksan, sukad, wan-a mahayang.

Unya sa payag, sige na lag pamintana

Si Nanay, layo ang tinan-awan.

Mga t-shirtni tatay nga giagup-op

Sulod sa kaban, iya gihapong labhan.

Hoy, Alimukon, hibalo kong saksi

Kang tatay, kay sa panahon

Nga kami maglingkod dinhis

Manggahan, ikaw ang kanunay nakong

Makit-an. Magtuhiktuhik sa yuta

Daw may gipangita. Apan karon,

Akong nasabtan kon nganong ang kanawkanaw

Sa imong mga kalimutaw, ning-aninaw.

Hoy, Alimukon, tingali didto may salag

Kang diin mga damgo ug kalipay gibilin.

Sagdi lang, kay inig abli ko aning halwa,

Imong mga pako idupa ug kab-ota ang langit

Kay didto, ikaw dili na mag-inusara.

Inig tabon nimo sa adlaw ako sab molakaw.

Kuyogan nako si Nanay pagtugbong sa syudad

Aron sundoon si Tatay pauli sa among payag.

-- JOSUA S. CABRERA


Cebu City, Philippines

ilab-ilab

Bisan pa og bali-balihon ang kalibotan
Natobilak gna nohilab-ilab go ap nisab.
Sabni pa og lab-ibalhion gan akilnatbo
Ang kilabonat hionlabi-bal go ap nisab.

Asu ar gna gnetrewp ahoralk
Horalka trewpeng nag ar sau
Pengtrew gan aklaroh sau ra
Usa ra ang pwerteng klaroha

Inlab gihapon ko’s imoha.

-- JOSUA S. CABRERA

Cebu City, Philippines

tigkulit sa carreta

Maayo pang mga namahulay sa menteryo, sige lang og katulog.
Way bangon-bangon. Way kaon-kaon. Way problema. Bisag banha
ang videokehan ni Nang Dayon, nga kon paminawon, puol pa
sa orasyon ni Nang Pasyon. Way imik, hilom lang gihapon.
Mga masuk-anong busina sa mga sakyanan nga natinggakol sa napawong
traffic light (usahay makugang ko, mahiwi ang mga letra nga akong gikulit
sa lapida). Wa jod ko kita'g kalag nga mobangon aron mamadlong.
Maayo sad sila, nakapahulay na. Gani kon hasolan ko, ganahan kog mingaw,
mo-relax, adto lang ko sa taliwala sa menteryo. Mohigda ko’s babaw
sa nitso. Matulog, magpundo og igong kusog kay medyo daghan ko
og order karon. Kulit na sad ko’g mga ngalan sa mga kwadradong marmol

nga bisag usa, wala pa'y akoa.


-- JOSUA S. CABRERA
Cebu City, Philippines

kaniadto

(kang Ana)

Naanad kos’ una,
Inig-gimaw sa adlaw sa bintana,
Mga kisaw sa mga tamsi
Mopukaw nako.
Inig abli sa pultahan,
Akong malantaw sa unahan,
Ang mga langgam mora’g mga dahong
Nanglupad gikan sa mga sanga

sa karaang’ Tsikos nga gabarog sa nataran.
Ang mga tamsi magkisikisi,
Uyog-uyogon ang mga sanga. Matagak
ang mga dahon, duyan-duyanon sa hangin
ug manggilaw inig halok sa adlaw samtang
Si nanay, sa ubos, bitbit ang silhig-tukog,
Maghangad paabuton ang mga dahong

Mopahiluna sa yuta.
Iyang silhigon. Tapukon. Halingan.
Mao tingali nga hangtod karon
Sa pagpamunga nagpadayon.
Napustan pa kong nanay og Tsikos
Aron bawnon.

Hahay, molakaw na sad. Balik sa syudad.
Dugay na kong wala kauli. Karon pa.
Ang higanteng punoan sa Tsikos,
nag-inusara.
Gimingaw.

Gilumotan na. Gahulat sa hapon.
Kay unyang hapon,
human og haling ni nanay
sa mga layang dahon

mamauli
ang mga tamsi.
Magkisikisi.

Mohilom.
Magpalabay

sa kagabhion.


-- JOSUA S. CABRERA
Cebu City, Philippines

paggikan

Pag-anunsiyo sa imong flight number
hugot ang atong mga bukton
Nga kanatong duha mialirong.
Samtang ang mga pasahero
Paspas sa ilang paglakaw
Padulong sa departure area,
Paspas sab atong kasingkasing
Og hangop sa kada segundong
Molabay samtang, samtang ania ka pa.

Karon. Ako. Nag-inusara.
Karong gabhiona,
paghigda ko sa akong kama
akong napanimhotan
ang kahumot sa imong perfume
nga nipilit sa akong t-shirt
ug ang imong lotion
sa akong palad nangalimyon.
Daw kaganiha ra sa kagahapon
Apan walay utlanan ang pangandoy
Nga sa kausa pa ikaw akong makita.

Nawalis ang kortina
sa akong lawak paghuyop
sa hangin. Ang imong katawa sa buwan
gikopya. Midunghay ang kagabhion
ug mihanig sa akong abaga.
Madungawan ko ang imong aping
midapat sa akong bukton.
Mabati ko ang hungihong
sa imong dughan, nagpahimangno
nga gisandig mo kanako
ang imong kaugalingon aron akong matimbang
ang imong gibug-aton ug unya ang gilay-on,
igo lang sad motudlo kanato
kon unsa ang gibug-aton sa paghandom.

-- JOSUA S. CABRERA

Cebu City, Philippines

kaluoy ni rambo

“Laing biktima sa vigilante
Nituasik ang utok.”
Niaslom akong nawong pagbasa nako sa balita.
“Nay, dia rang newspaper!”
Akong gibutang sa lamesa duol sa pultahan.
Nagsuot ko sa dakong t-shirt ni Tatay
nga may tatak P sa likod, bugtong pasalubong niya
gikan sa BBRC. Mora’g sayal. Pwede di na magpurol.
Dali nakong gibunlot ang kaliring nga ligid
Sa habal-habal ni Tatay sa wa pa ni mapriso,
gisandig sa tangkal ni Rambo, among irong kagiron.
Akong gikaliring padulong sa dalan. Apan kalit lang
napatiran ni Uncle Momoy ang kaliring, pwerteng
Pagkasalay sa liog ni Rambo nga nagmukmok gawas
Sa iyang tangkal. Gitangkal man god ni’s Rambo
Kay nakapaak sa una. Gibuhian karon kay luoy man sad.
Haskang kurata ni Rambo, nidagan palayo sa kaliring.
Samtang si Uncle Momoy nagdali, nangluspad.
Padulong sa among balay.
“Asa imong nanay, Doy?!”
Wa ko nitubag, akong gigukod si Rambo, nagdagan sa dalan.
Naurong ko kay kalit lang milabay ang usa ka patrol car.
Naligsan si Rambo. Na-flat ang ulo. Nituasik ang utok.
Wa ko kalihok. Mao na lay akong nadungog ang tiyabaw
Ni Nanay, nigawas sa balay nga bitbit ang newspaper.
“Kaingnon ko ba’g kuyog mo gabii, mao diayng wa siya kauli,
Mao diay!” Tiyabaw nanay ngadtong Momoy.
Igo lang gigakos ni Uncle Momoy si Nanay.
Nidagan ko padulong nila. Nityabaw sad ko.
“Nay, kaluoy ni Rambo!”


-- JOSUA S. CABRERA
Cebu City, Philippines