abohon nga kapunawpunawan

Dinhi sa tinagua'ng payag
gilad-ok ko ang tinulo
sa matag litok sa balak
nga sa paglahutay
mahubsan tugbang
sa mga luha'ng
way kinutoban.

Lumalabay nga panganod
halos mahakop nako.

Gikan sa Tuburan
ang mga langgam, gadayandayan

sa kahanginan. Bisan ang way
pangisip nga mga bukya
mituman sa ilang tahas.

Kita migamot na sa yuta,
apan sa gihapon nangandoy sa paglupad
nga wa'y kataposan...

Nagsud-ong ako kanimo
sa imong pagtutok

sa abohon nga kapunawpunawan--

ang bidlisiw mao
ang imong mga mata
nga mibukot sa batonaw

ug ako nakasugakod.


-- CANDICE SALAZAR
Calgary, Alberta, Canada

duha ka haiku: sa balilihan

Natig-ang sapa,
ugang hangin sa patag--
lugti kong panit.

Gansa milangyaw.
Lahos sa kilumkilom,
daling nahanaw


-- CANDICE SALAZAR
Calgary, Alberta, Canada

ang mga bitoon ni vincent van gogh

salimuang batok sa kangiob
lanog nga daguyngoy sa idlas
nga pagbating naghubad sa bulok
panganod sa kumpas miikis

bitoong nakig-indig sa bulan
idlip sa oro sa langit mibakho
lahos sa kalibonan makit-an
urom sa mga mata'ng abyerto

ang kalikopan way alamag
malinawon sa iyang pagkatulog
kasakit sa salamin gikudlit
debuhong sa langit gilalik

iyang kaluhang kinaiyahan
tingob nga halad sa alampat
ang hinapos nga sangputanan
pangindahay, ang kamatayon...


-- CANDICE SALAZAR
Calgary, Alberta, Canada

anup-op nga damgo

Balak, naghulma og anino
sa nagbaguod nga huyuhoy
nagpahipi
ug hapit ko mahakop.

Ang akong kasingkasing miugnat
sama sa lawalawa.
Ang gilay-on wa nay gahom.

Balak nga miukit og larawan
sa pulong nga motukob,
molikos sa kangitngit.

Katulogon wala bati-a.
Unsay pulos sa kahayag
kon ang panan-aw gibabagan
sa handurawan?

Dalikyat nga pamilok
ug gabonong damgo. Wa’y bulok.
Naaninag nako ang tubig,
Wa’y anino.

Ako ang dahong milutaw sa lim-aw
sa nalubog nga panganod.
Tan-awa! Naglupad ko
sa nagkatualing kalibotan.


-- CANDICE SALAZAR
Calgary, Alberta, Canada

ang langgikit sa alampat

Sa taliwala sa kabanha
nabati ko ikaw...

Gisubay ko pag-usab
ang akong mga lakang--
nalamat sa imong balak,
nahimong abog sa akong tiilan.

Ang kamig sa kasingkasing
nasakmit ug nalaming,
gipasibo sa utlanan
sa pulong ug handuraw.

Apan sa unahan sa nagsalimu-ang
ug binalanggong alimpatakan,
mipatigbabaw gihapon ang pagsabot
nga wala mapukan sa manggad.

Ang pak-an nga kalag
mituyhakaw ngadto
sa way sukod ug way kinutuban--
ang alampat...


-- CANDICE SALAZAR
Calgary, Alberta, Canada

haiku: ang pak-an

gilak sa lim-aw,
adlaw'ng misalop-- langgam
mubo og lupad


-- CANDICE SALAZAR
Calgary, Alberta, Canada

gabonon...

ang way-dagway nga pagbati
nangadugmok...
mga tipaka sa gialig-ig nga kahimatngon.
nahisaag ako sa dalan padu'ng sa langob.
may luna ba ako diha sa labing lawom?
ako ang gamot nga naniba
sa nagkahanaw nga dinagayday sa sapa
nagkalayo...

-- CANDICE SALAZAR
Calgary, Alberta, Canada

haiku: haw-ang

Law'm nga hinuktok.
Inanay nga naunlod--
dahon sa lim-aw.

-- CANDICE SALAZAR
Calgary, Alberta, Canada

ang pit-os nga dalan

Nilahos og tuyhakaw ang kahayag
taliwala sa langit ug kanawkanaw,
nihikyad sa adlaw nga nahimong
tukod sa unos sa panahong mahagiton
ug nisala sa utlanan
sa lamukat nga balatian.

Ang pluma nitangtang
sa hiniktang’ pulong
nga lihay sa kamatuoran.
Nagtyabaw ang kahilom ngadto sa hangin!
Sama sa espongha, misupsop sa kasakit.

Ang kinaadman ba molihok
kon ang panghunahuna binilanggo?
Puga-a ang hangin! Luwasa
ang napatik sa alimpatakan

alang sa kagawasan--
ang walay pagkupas
nga mga bulok sa bangaw.


-- CANDICE SALAZAR
Calgary, Alberta, Canada

upat ka haiku

nagdagang iro
hanap sa kanawkanaw
sa balilihan

linaw nga sapa
gihapak sa amihan:
hulagway'ng kunot

maputing langgam
sa puti nga panganod:
lubad sa luna

ang tanang bulok
sa gabiing mangiob
haw-ang nga adlaw


-- CANDICE SALAZAR
Calgary, Alberta, Canada

hagawhaw

Gatagbaw og awas
ang gabonong linitokan--
hagawhaw nga dalugdog
sa kahinam.

Balak, mihapuhap
ug mikutaw sa hilom nga sapa...

Nikuyanap ang lama sa tanlag
sama sa buhawi'ng mitabastabas sa yuta
nga milugdang sa akong kahiladman.

Ang mga mata naghupot
sa gutlo sa kasayoran...
dili maaninaw ang sihag
nga lawas sa yanong panan-aw
sama sa hangin, mabatyagan
apan dili makita.

Tinamay ang akong hagawhaw
sa lawom nga atabay
ug ang tumong nga maaninaw
dili alang sa tanan.


-- CANDICE SALAZAR
Calgary, Alberta, Canada

haiku: nangatuali

dahong naglupad
sa lubog nga panganod:
linaw nga sapa

-- CANDICE SALAZAR
Calgary, Alberta, Canada

may gamot ba ang kalipay?

Kon pwede lang unta
igaid ang kalipay.
Kon pwede lang unta
ibutang sa garapa
o di ba himoong pickles para molungtad.
Asinan ba kaha para magdugay.
May langit ba ang ugat sa kalipay?
O sama sab sa kasakit, naggukod sa hangin
nga lumalabay sama sa usa ka ferris wheel--
taas nga kalipay, mubo nga kalipay--
bisan unsa kahabog,
mousab kini padulhog.


-- CANDICE SALAZAR
Calgary, Alberta, Canada

gukod sa kinaiya

Sa pagpatiurok ko
sa kahiladman sa lawod
gipangita ko ang tinalikdan
kong pagbati apan ikaw
ang nasugatan ko.
Sa matag adlaw
ang pader nagkahugno,
ang utlanan miuswag
Ang luya kung kalag
ug hanipis kong lawas
mikatkat sa bungtod
aron malangkob si bathala
O, kining himayang dalikyat!
Makaplagan ba kita?
Tingali kinahanglan ko pa
ang dugang kubkob sa sukaranan...


-- CANDICE SALAZAR
Calgary, Alberta, Canada